Yaz yaxınlaşır, çərşənbələr bir-birini əvəz edir, Çempionlar Liqasında isə pley-off həyəcanı davam edir.

Bu gün və sabah 1/4 finalın ilk iştirakçıları bəlli olacaq. “Bavariya” və “Real Sosyedad” səfərdəki məğlubiyyətin qısasını evdə almağa çalışacaqsa, rəqib meydanından qələbə ilə dönən “Real” və “Mançester Siti” sürprizə imkan verməməyə səy göstərəcək.

“Real Sosyedad”ın...
“Bavariya” artıq uçurumun kənarındadı. Bu gün “Latsio” ilə oyunda lazımi nəticə əldə olunmasa, komanda “kəlləmayallaq” aşağı yuvarlanacaq. Çünki artıq ölkə kubokunda mübarizə dayandırılıb və bundesliqada da iş möcüzəyə qalıb. Münhen nəhəngi 2011/12-dən bəri ilk dəfə mövsümü titulsuz başa vurmağa çox yaxındı! Etiraf edək ki, “Latsio”nu Münhen səddini aşaraq 1/4 finalda görmək qəribə olacaq. Çünki komanda bu mövsüm qeyri-adi oyun sərgiləmir və A seriyasında da liderdən 29 xal geridə olmaqla 9-cu pillədə qərarlaşıb. Romalılar ÇL-in 1/4 finalında sanuncu dəfə 1999/00-də oynamışdı. Həmin komandanın bu uğuru təəccüblü görünmürdü. Çünki “Latsio” həmin mövsüm A seriyasının qalibi olmuşdu! İndi isə romalılar ilk görüşdə, sadəcə, “Bavariya”nın böhranda olmasından yararlandılar. Bunu o fakt da sübut edir ki, cəmi 3 il öncə ənənəvi formada olan “Bavariya” bu rəqibini həm səfərdə (4:1), həm də evdə (2:1) asanlıqla məğlub etmişdi. “Rekordmayster” hazırda ÇL-də evdə 13 oyunluq məğlubiyyətsiz seriyaya (10 qələbə, 3 heç-heçə) malikdi və son 11 mövsümün 10-da ən azı 1/4 finala qədər irəliləyib. Amma bir məqamı vurğulayaq ki, “Bavariya” pley-offa səfər məğlubiyyəti ilə başladığı son 15 halın 12-də mübarizəni dayandırıb! Buna misal kimi ötən mövsüm “Mançester Siti”, ondan əvvəlki mövsüm “Vilyarreal” ilə duelləri xatırlamaq olar. Komandanın soncuncu geridönüşünü xatırlamaq üçün 2014/15-ə yollanmalıyıq. O vaxt 1/4 finalda “Portu” ilə səfərdəki 1:3-lük məğlubiyyətdən sonra evdə 6:1-lik qələbə əldə olunmuşdu. “Latsio” isə avrokubokların pley-offuna indiyə qədər 18 dəfə ev qələbəsi ilə başlayıb və bunların 12-də mərhələni adlayan tərəf olub. Digər duelə gəlincə, “Real Sosyedad” çətin Paris səfərində təxminən 1 saata yaxın qapısını toxunulmaz saxlasa da, nəticədə evə 2 cavabsız qolla qayıtmalı oldu. Bu nəticədən sonra san-sebastyanlılar 1982/83-dən bəri ilk dəfə bu turnirdə 1/4 finalı görmək üçün həqiqətən də qüsursuz peromans sərgiləməlidi. Hədəf ilk baxışdan mümkünsüz kimi görünsə də, futbolda, xüsusilə də ÇL-də mümkünsüz heç nə yoxdu. Ən azı “Nyukasl” təcrübəsi göstərir ki, PSJ-ni böyük hesabla yenmək mümkündü. Çünki “sağsağanlar” bu mövsüm qrupda evdə PSJ-ni darmadağın etmişdi (4:1). Maraqlıdı ki, turnir ÇL adı ilə keçiriləndən bəri “Real Sosyedad” yalnız bir dəfə - 2003/04-də 1/8 finalda oynayıb və o vaxt da rəqib məhz Fransa təmsilçisi idi. Həmin vaxt Nihat Kahvecili “Sosyedad” “Lion”a həm evə, həm də səfərdə 0:1 uduzmuşdu. Baskların ÇL-də son 9 ev oyununda cəmi 1 qələbə qazanması (5 heç-heçə, 3 məğlubiyyət) bu klub üçün heç də ürəkaçan fakt deyil. Buna qədər avrokubokların pley-offunda “Sosyedad”ın ilk matçda səfərdə uduzmasına cəmi 8 dəfə rast gəlinib və komanda bunların yalnız ikisində mərhələni adlayıb. PSJ indiyə qədər 18 dəfə pley-offa ev qələbəsi ilə başlayıb və bunların 12-də yekunda istəyinə çatıb. Amma maraqlıdı ki, komandanın son iki halda evdə qalib gələndən sonra mərhələni adlaya bilməməsi məhz İspaniyada baş verib! Bu, 2021/22-nin 1/8 finalında “Real” (evdə 1:0, səfərdə 1:3) və 2016/17-nin 1/8 finalında “Barselona” (evdə 4:0, səfərdə 1:6) ilə duellərdə yaşanıb.

...və “Leyptsiq”in sürprizə gücü çatacaqmı?
“Leyptsiq” ilk görüşdə uduzsa da, heç bir oyun komponentində adlı-sanlı rəqibdən geri qalmadı və sona qədər də “Real”a ciddi problemlər yaratdı. Madrid nəhəngi La Liqada turnir cədvəlinə başçılıq etsə də, son oyunlarda tez-tez xal itirir. Karlo Ançelottinin komandası son 9 rəsmi oyunda 6 qələbə qazanıb və bunların yalnız 2-də rəqiblərini ən azı 2 top fərqi ilə yenib. Səfərdə keçirdiyi son 9 rəsmi oyunun hamısında qol vuran “Leyptsiq”in itiriləsi bir şeyi qalmayıb. Cütün aşkar autsayderi sayılan “öküzlər” bu baxımdan meydana rahat çıxacaq. Bu cür böyük potensiala malik kollektiv isə belə hallarda hər an sürpriz etməyə qadirdi. Təcrübə baxımından komandaları tərəzinin eyni gözünə qoymaq gülməli olar. “Real” ÇL-in 14 qat qalibi olduğu halda, “Leyptsiq” avrokuboklarda cəmi 7-ci mövsümünü keçirir. Diqqəti çəkən məqam odu ki, ötən mövsümün qrup mərhələsində məhz bu rəqibə qarşı səfər oyununda qeydə alınan məğlubiyyət “Real”ın Almaniya klublarına qarşı keçirdiyi son 17 oyundakı yeganə uğursuzluğudu (12 qələbə, 4 heç-heçə). Eyni zamanda “Kral klubu” ÇL-in pley-offunda almanlara qarşı son 8 duelin hamısında mərhələ adlayıb. Son uğursuzluq 2012/13-ün yarımfinalında Dortmund “Borusiyya”sına qarşı qeydə alınıb (səfərdə 1:4, evdə 2:0). “Real” tarixi ərzində avrokubokların pley-offuna 38 dəfə səfər qələbəsi ilə başlayıb və bunların 36-da mərhələni adlayıb. “Leyptsiq”in isə tarixi o qədər dardı ki, avrokubokların pley-offunda ilk oyunda doğma stadionda uduzması faktına rast gəlinməyib! Buna bənzər yeganə hal 2020/21-də ÇL-in 1/8 finalında baş verib. Həmin vaxt “Leyptsiq” “Liverpul”a hər iki oyunda 2 cavabsız qolla uduzmuşdu. Amma o vaxt hər iki görüş Budapeştdə keçirilmişdi. Bu mərhələdə faktiki sürprizin baş tutmaq ehtimalı olmayan yeganə oyun Mançesterdə keçiriləcək. Kopenhagendən inamlı qələbə ilə dönən ÇL-in son qalibi “Mançester Siti”nin rahat şəkildə adını ən güclü 8 komanda sırasına yazdıracağı gözlənilir. Yeganə sual doğuran məqam ÇL-də 9 oyunluq qələbə və 17 oyunluq məğlubiyyətsiz seriyaya malik olan Qvardiolanın komandasının neçə qol vuracağı ilə bağlıdı. Hərçənd Danimarka çempionunun bu mövsüm qrup mərhələsində səfərdə “Bavariya” ilə oyunda qapısını toxunulmaz saxladığını unutmayaq. Digər tərəfdən “Kopenhagen” “Etihad”da oynamağın necə cəhənəm əzabı olduğunu bilir. Ötən mövsüm qrup mərhələsində bu komanda bu stadionda 5 cavabsız top buraxmışdı. Maraq üçün bildirək ki, “Siti” indiyə qədər avrokubokların pley-offuna səfər qələbəsi ilə başladığı 14 halın hamısında mərhələ adlayıb!

1/8 final, cavab oyunları
5 mart
Bavariya – Latsio 3:0
Harri Keyn, 39, 66, Tomas Müller, 45+2
Cəzalı: Upamekano/yoxdu
Hakim: Slavko Vinçiç (Sloveniya)
İlk oyun – 0:1.

Real Sosyedad – PSJ 1:2
Mikel Merino, 89 - Kilian Mbappe, 15, 56
Cəzalı: yoxdu
Hakim: Maykl Oliver (İngiltərə)
İlk oyun – 0:2.

6 mart
Real – Leyptsiq 1:1
Vinisius Cunyor, 65 - Villi Orban, 68
Cəzalı: yoxdu/Simakan
Hakim: Davide Massa (İtaliya)
İlk oyun – 1:0.

Mançester Siti – Kopenhagen 3:1
Manuel Akanci, 5, Xulian Alvarez, 9, Erlinq Haaland, 45+3 - Məhəmməd Əlyunussi, 29
Cəzalı: yoxdu
Hakim: Espen Eskos (Norveç)
İlk oyun – 3:1.