Milli Məclisin plenar iclasında Fazil Mustafa maraqlı təkliflə çıxış edib. Onun fikrincə, işğaldan azad olunan Ağdamla tikilən yeni stadiona “Qarabağ”ın baş məşqçisi Qurban Qurbanovun adı verilməlidi. İndiyə qədər həmin yeni stadiona mərhum Milli Qəhrəman Allahverdi Bağırovun adının verilməsi təklifi də səslənib.

“Football-plus.az” həmkarımız İlqar Rəsulun bu mövzuda qələmə aldığı yazını təqdim edir.

Təkcə nə danışmağı yox, həm də nə vaxt danışmağı bilmək çox vacibdi. Bu gün hamını xoşbəxt edən adamın adını dünən hamını xilas etmiş adamın adı ilə niyə üz-üzə qoyub söz-söhbət yaradırsan axı. Danışığını bilməyən başqaları da dursun mübahisəyə qoşulub günah eləsin, xətrə dəysin, qəlb qırsın. Bu da "sağ ol"umuzdu bizi qələbədən qələbəyə aparan adamlara?!

Stadiona ad qoymaq vaxtıdı? Bilmirsiz ki, azarkeşin bir şakəri də bu gün göylərə qaldırdığını sabah yerlə bir etməkdi? Onda nə edəcəksiz? Çıxıb deyəcəksiz, yox, onsuz da stadion hələ tam tikilib qurtarmayıb, gəlin başqa ad qoyaq?

Qoy tikilsin, hazır olsun, zamanı gələndə hərə öz təklifini versin. Onsuz da əvvəldən iki təklif var. Bu da olsun 3-cü, 4-cü, 5-ci. Onda mübahisə yaranmayacaq. Əksinə, maraqlı olacaq. Çünki son sözü onsuz da camaat deyəcək.

Özü də o adamların adlarını üz-üzə qoyurlar ki, ikisinin də məqsədi, amalı, dərdi Məmləkətə faydalı olmaqdı, xalqını xoşbəxt etməkdi, adına divar hördürmək yox.

Hər dövlətin, hər xalqın ən uca divarı onun tarixidi. Və o iki nəfərin adı artıq o divara yazılıb...