Sabah "Qarabağ" Avropa Liqasının pley-off mərhələsində "Braqa"nın qonağı olacaq.

"Football-plus.az" xəbər verir ki, matçdan öncə ağdamlıların futbolçusu Julio Romao mətbuat konfransında iştirak edib. Sizi onun fikirləri ilə tanış edirik:

- Sabah oyunun necə keçəcəyini gözləyirsən?
- Oyunun nəticəsini detallar həll edəcək. "Braqa" kimi biz də qalib gələ bilərik. "Braqa" ciddi rəqibdi. Amma bura Avropa Liqasıdı. Rəqibi tanımaq üçün kifayət qədər vaxtımız olub. Hər iki komanda qələbə qazanmaq iqtidarındadı.

- Portuqaliyada oynamısan. Baş məşqçiniz səndən "Braqa" haqda məlumat öyrənib?
- Xeyr. Şəxsən məndən heç nə soruşmayıb. Rəqibin oyunlarını izləmişik. Baş məşqçimiz bildirdi ki, "Braqa" sürətli, və hücumameyilli futbol sərgiləyən komandadı.

- Portuqaliyalılar üçün "Qarabağ"ı necə xarakterizə edərdin?
- Həm ölkə çempionatında, həm də avrokuboklarda topu ələ keçirən kimi dərhal sürətli hücumlara çıxırıq. Bu, bizim ən təhlükəli tərəflərimizdən biridi. Ölkə çempionatında rəqiblər öz meydançalarına qapanan zaman topa nəzarət və əks-hücumlardan istifadə edirik.

- "Braqa"da ən çox kimdən təhlükə gözləyirsiz?
- Ən təhlükəli oyunçu Əl-Musratini hesab edirdim. Artıq o komandanı tərk edib. Amma Calo və Bruma da təhlükəlidi. Həm hücumda, həm müdafiədə komandaya kömək edirlər.

- Bu mövsüm "Bayer"lə qarşılaşmısız. Leverkuzen təmsilçisini "Braqa" ilə müqayisə etmək olar?
- "Bayer"in topa nəzarəti, rəqibə etdiyi pressinq çox möhtəşəmdi. Hər hansı bir müqayisə edə bilmərəm. Amma "Braqa" da illər boyu adını, nüfuzunu saxlamış komandadı. "Bayer"lə oyunda çəkdiyimiz çətinliyi sabah da çəkəcəyimizə inanmıram.