Kilian Mbappenin PSJ ilə müqaviləsini yeniləməmək qərarına gəldiyi bir neçə gün əvvəldən məlum idi. Klubun onu hər vəchlə dilə tutmağa çalışacağı gözlənilirdi.

Ancaq son xəbərlərə görə, rəhbərlik bundan sonra dünya çempionunu fikrindən daşındırmaq üçün heç bir ciddi cəhdə əl atmayacaq. Başqa sözlə, hücumçu mövsümün sonunda komandanı azad agent kimi tərk edəcək. Kilianın rəhbərliyin daha cəlbedici şərtlərini geri çevirdiyi də məlumdu. Əksər beynəlxal informasiya mənbələri bir neçə gün əvvəl onun məlum qərarı ilə 100 milyon avroluq bonusdan imtina etdiyini xəbər vermişdi. Yeri gəlmişkən, futbolçunun PSJ-də illik məvacibinin 72 milyon avro olduğunu da bildirək.

Amma o, yeni mövsümdən bu klubda oynamaq istəmədiyini rəhbərliyə bildirib. İddiya görə, Kilian bununla əslində PSJ-də daha cəlbedici şərtlərlə qalmağa hazır olduğuna da işarə vurub. “Marka” qəzeti isə prezident Nasser Əl-Xelayfi klubun marqlarının daha yüksəkdə olduğu qənaətinə gələrək hətta Mbappe səviyyəsində oyunçuya belə xahiş-minnət etməməyi qərara alıb. Klub bundan sonra futbolçuya şərtlərini əvvəlki illərdə olduğu kimi rəhbərliyə diktə etmək imkanı verməməyi lazım bilib.

Yeri gəlmişkən, Mbappenin artıq karyerasını “Real”da davam etdirmək qərarına gəldiyi fevralın 5-də məlum olmuşdu. Bəzi mənbələr onun bu haqda tezliklə açıqlama verəcəyini bildirmişdi. Amma dünya çempionu hələ ki, bu mövzuda açıq danışmağı lazım bilmir. Bir neçə gün əvvəl Kilianın İspaniya klubu ilə illik 32 milyon avroluq məvacibi nəzərdə tutan 6 illik müqavilə imzalayacağı da iddia edilmişdi. Lakin sonradan onun Madridə yollanmaya biləcəyi də vurğulanmışdı. Görünür, Mbappe qarşı tərəflə danışıqlarda da manevr etməyi planlaşdırır.