“Düşünürəm ki, tribunanın gözəlləşməsi naminə 1500 manatı AFFA-ya ödəməyə dəyər” – “Forza Neftçi”dən cazibədar cavab
AFFA İntizam Komitəsinin son iclasında "Neftçi" ilə "Turan-Tovuz"un azarkeşləri pirotexniki vasitələrdən yararlandığına görə 1500 manat cərimələndiyini xəbər vermişdik.
Belə hərəkətlərin kluba baha başa gəldiyini bilirik. Bəlkə də klub heç bilet satışından bu qədər pul qazanmır. Görəsən, azarkeşlər çıxış yolunu nədə görür? Bu sualı "Forza Neftçi"nin üzvlərindən Tural Alışova və “Turan-Tovuz”la azarkeşləri arasında əlaqələndirici Kamal Saqqayevə ünvanladıq.
Tural Alışov:
"Düşünürəm ki, tribunanın gözəlləşməsi naminə 1500 manatı AFFA-ya ödəməyə dəyər. Ən azı Olanareyə verilən təzminatdan daha dəyərsiz deyil. Bəli, düz buyurursuz. Klub bilet satışından bu qədər pul qazanmaya bilər. Sırf maliyyə baxımından düşünsək, tribunanın belə hərəkətliliyi biganə azarkeşlər üçün cazibədar görünə bilər və növbəti oyunlarda cərimənin pulunu çıxara bilər".
Kamal Saqqayev:
"Bu hadisə "Kəpəz" - "Turan-Tovuz" oyununda çox sevindiyimiz üçün baş verdi. Bacardığım qədər qarşısını almağa çalışdım. Bu haqda fanklubla söhbət etdik. Bunların komandamıza, büdcəmizə ziyan vurduğunu bilirik. Çox güman, bir də belə birşey təkrarlanmayacaq".
GÜNAY SÜLEYMANOVA
