Ölkə klubları qış fasiləsində heyətə 7 əcnəbi futbolçu cəlb edib.

Əslində bunlardan ikisi – Rafael Utziqlə Klesio Bauk əvvəllər də çempionatımızda oynayıb. Bəs legionerlər 19-cu turda nə ilə yadda qaldı, baş məşqçilər onlara nə dərəcədə güvəndi?

Rafael Utziq (Zirə)
Meydanda olduğu vaxt: 67 dəqiqə. “Futbol+”dən aldığı qiymət: 5,0.
Braziliyalı forvard yeni komandasıyla ilk rəsmi matçına əsas heyətdə çıxdı. Artıq komandaya uyğunlaşdığını demək mümkündü. Hücumçunun mövqe mübarizələrində aqressiv olduğunu gördük. Elə ilk hissədə rəqib oyunçu Adi Mehremiçlə bir necə dəfə toqquşdu. 18-ci dəqiqədə ilk təhlükəli vəziyyətini yaradan futbolçu qapıçıyla təkbətək mübarizədən qalib ayrıla bilmədi, ardından hakim ofsayd qərarı verdi. Oyunçu sürəti baxımından rəqib müdafiəçilərdən nisbətən geridə qalırdı. 55-ci dəqiqədə hava mübarizəsi zamanı “Səbail”in oyunçusu Deslandesə qarşı kobudluğa görə sarı vərəqə ilə cəzalandırıldı. Baş məşqçi Rəşad Sadıqov 67-ci dəqiqədə onu İssa Cibrilla ilə əvəzlədi. Beləliklə, yeni komandasının heyətində ilk rəsmi oyunda fərqlənə bilməsə də, ümumilikdə fəal təsir bağışladı.

Madi Queta (Səbail)
Meydanda olduğu vaxt: 13 dəqiqə. “Futbol+”dən qiymət almayıb.
Portuqaliyanın ikinci liqa təmsilçisi “Mafra”dan transfer olunan Qvineya-Bisau yığmasının 25 yaşlı üzvü ilk matçda artırılan vaxtı da nəzərə alsaq, 13 dəqiqə meydanda ola bildi. 84-cü dəqiqədə Rüfət Abdullazadəni əvəz edən “Portu”nun yetirməsi oyuna qoşulduğu andan hücumlarda fəallıq göstərdi. Meydanda olduğu qısa müddətə əsasən dəyərləndirmə aparmaq çətin olsa da, yaxşı performans sərgilədiyini deyə bilərik.

Alfa Konte (Neftçi)
Meydanda olduğu vaxt: 13 dəqiqə. “Futbol+”dən qiymət almayıb.
Bolqarıstanın elita təmsilçisi “Lokomotiv”dən transfer olunan 23 yaşlı vinger özünü göstərə bilmədi. 82-ci dəqiqədə Şinyaşikinin əvəzinə meydana çıxan hücumçunun bunun üçün cəmi 13 dəqiqəsi var idi. Topa ilk toxunuşu son dəqiqələrə təsadüf etdi. Qapını yoxlasa da, zərbəsi heç bir təhlükə yaratmadı. Futbolçunun hələ komandaya uyğunlaşa bilmədiyini görmək çətin deyildi. Ayrıca mövqe seçimində çətinlik çəkdiyini də qeyd etmək olar. Hələ ki Syerra-Leone yığmasının üzvü haqnda bunları demək olar. Gələcəkdə necə olacağını izləyib görərik.

Aleks de Souza (Turan Tovuz)
Meydanda olduğu vaxt: 16 dəqiqə. “Futbol+”dən qiymət almayıb.
“Kəpəz”lə qarşılaşmanın 79-cu dəqiqəsində Ayxan Quseynovun yerinə meydana çıxdı. Cəmi 16 dəqiqə meydanda olmasına rəğmən, sürətli oyun nümayiş etdirdiyini görmək olardı. Xatırladaq ki, braziliyalı vinger Litvanın “Hegelmann” klubundan trensfer edilib.

Qalan əcnəbiləri - Brayan Moreno (Neftçi), Ayub Masika (Səbail) və Klesio Bauku (Qəbələ) meydanda görmədik.

KAMAL SƏFƏR