"Bu cür qərarlar artıq dördüncü ildi ki, davam edir"
Misli premyer-liqasının 19-cu turunda "Səbail" "Zirə"ni qəbul edib - 0:0.
"Football-plus.az" xəbər verir ki, matçdan sonra qonaqların çalışdırıcısı Rəşad Sadıqovun mətbuat konfransı keçirilib. Sizi onun fikirləri ilə tanış edirik:
"Oyunda çoxsaylı mübarizə getdi. Daha aktiv başlayan tərəf biz idik, yaxşı da qol fürsətləri əldə etdik. 30-35 dəqiqə oyun bizim üstünlüyümüz şəraitində keçdi, daha sonra oyun bərabərləşdi. Həmin dəqiqələrdən sonra keyfiyyətli futboldan danışmaq olmaz. Çünki daha çox mübarizə gedirdi. Süni örtüklü meydanda oynayırdıq, şiddətli külək də var idi. Futbolçuların keyfiyyətli futbol nümayiş etdirməsinə mane olurdu. Amma hər iki komandanın futbolçuları çox istəkli idilər. Buna görə də hər iki tərəfə alqış düşür. Qələbə qazanmaq üçün çox çalışdılar. Ancaq olmadı. Matçın əvvəlində yaxşı qol fürsətlərimiz var idi. Futbolçuların çıxışından razı qaldım. Qələbə üçün əllərindən gələni etdilər".
- Rafael Utziq “Zirə” formasında ilk rəsmi matçına çıxdı. Onun çıxışını necə dəyərləndirirsiz?
- Müsbət dəyərləndirirəm. Özünü yaxşı tərəfdən göstərdi. Əslində, bu gün ilk dəqiqələrdən başlamasını istəməzdim. Amma məcburiyyətdən belə oldu, seçimimiz yox idi. Rüstəm Əhmədzadə də 5-6 gün idi ki, xəstələnmişdi. Məşqləri buraxmışdı. Utziqlə yanaşı, digər yeni transferimiz Ceyhun Nuriyev də özünü yaxşı tərəfdən göstərdi. Tam optimal formalarını bərpa etmək üçün hər ikisinə də zaman lazımdı.
- Onun əvəzlənməsi məcburiyyətdən irəli gəlirdi?
- Bəli, ondan sonrakı dəqiqələr Utziqin meydanda qalması riskli idi. Mübarizə aparırdı, istəkliydi. Hazır olmaması zədəyə apara bilərdi.
- VAR-ın qərarına münasibətiniz necədi?
- VAR-ın qərarı düz idi. Penalti epizoduna baxması üçün təcrübəli İnqilab bəy baş hakimi VAR-a çağırdı. Amma baş hakim VAR-da çox qəribə qərar verdi. Açıq-aşkar futbolçumuzun ayağına zərbə vurulur, ikinci sarı vərəqə, ardınca qırmızı verilməlidir. Nə qədər deyirik, danışırıq... "Zirə"nin oyunlarındakı bu cür qərarlar artıq dördüncü ildi ki, davam edir. Keçən il bir az azalmışdı. Mövsümün əvvəlində də az idi. Baxırsan ki, bu, istərsə də, "Qarabağ"la matçdakı qırmızı vərəqə epizodu... Bundan əvvəlki turlarda baş verən hadisələr. Bu qədər təsadüf ola bilməz.
- Rüstəm Əhmədzadənin vəziyyəti nə yerdədi?
- Onsuzda, hücum xəttində futbolçu qıtlığımız var idi. O da zədələndi. Yəqin ki, 2-3 həftə komanda ilə olmayacaq. Bu da bizim üçün əlavə problemdi. 3-4 gündən bir oyun gəlir, hər futbolçumuza ehtiyacımız var. Zədələnməsi bizi məyus etdi. Ancaq futbolun içində olan şeylərdi.
Digər xəbərlər
