Kəpəz dağı Murovdağ silsiləsinin şimal yamacında yerləşir. 1139-cu il sentyabrın 30-da baş vermiş zəlzələ nəticəsində bu dağdan böyük qaya parçaları qoparaq Ağsu çayının dərəsinə tökülüb və çayın qabağını kəsib. Nəticədə çayın yatağında Göygöl, Maralgöl və başqa göllər əmələ gəlib ki, bunlar bizim təbii sərvətlərimizdi.

Ümumiyyətlə, təbiətimizin qiymətsiz mənzərələrindən biridi. Əminəm ki, bütün azərbaycanlılar həm Kəpəz dağından, həm də uçqunlardan sonra viran etmək əvəzinə ortaya çıxardığı gözəlliklərdən zövq alır.

Bu gün Gəncəni təmsil edən “Kəpəz” bəhs etdiyimiz dağın adını daşıyır. Lakin təəssüf ki, nə o dağ qədər ucadadı, nə də onun qədər zəngin sərvətlərə malikdi. Əksinə, turnir cədvəlinin 9-cu pilləsində qərarlaşıb və premyer-liqanın yeganə sponsorsuz komandasıdı. Mənzərəsi təmsil etdiyi dağ qədər göz oxşamır. Futbol prizmasından yanaşsaq, uğurlu nəticələrdən söhbət gedə bilməz. Kollektiv baş məşqçi Adil Şükürovun rəhbərliyi altında vəziyyətdən çıxmağa çalışmaqdadı. Belədə qış fasiləsi çox yaxşı fürsət idi. Bir neçə həftə boş vaxt o demək idi ki, həm heyətini gücləndirə biləsən, həm də yoxlama oyunlarında həmin futbolçuları sınayıb gücünə güc qatarsan. Gözlənilən olmadı. “Sarı-göylər” bu ərəfədə cəmi bir oyunda meydana çıxdı. Halbuki planda üç matç var idi. “Araz-Naxçıvan” və “İmişli” ilə qarşılaşmalar müxtəlif səbəblərə görə təxirə salındı. Bundan başqa, üç futbolçu icarəyə götürüldü. Əlbəttə, Amil Yunanov, Camal Cəfərov və Ədilxan Qarəhmədovun komandaya uyğunlaşması, ən azı öz formasına qovuşması üçün müəyyən vaxt lazım olacaq. Təki gecikməsinlər. Yoxsa vay “Kəpəz”in halına...

Əslində legioner də transfer ediləcəkdi. Hələ ki səs-soraq yoxdu. Əcnəbi futbolçudan danışdım, yadıma düşdü. Bilirsiz də, Adil Şükürov qapıçı Vladislav Vasilyuçeki komandada görmək istəmir. Çünki həm keyfiyyətli futbolçu deyil, həm də əlavə maliyyə itkisidi. Məsələ budu ki, Vasilyuçekin müqaviləsinin müddəti cari mövsümün sonunda bitir. Rəhbərlik onunla müqaviləyə xitam vermək istəsə də, oyunçu getmək niyyətində deyil. Niyə? Təzminat tələb edir. “Kəpəz” isə maddi cəhətdən o qədər çətin durumdadı ki, futbolçunun ödənişini edib canını qurtara bilmir. Vəziyyətin nə dərəcədə kritik olduğunu klubun, sadəcə, ehtiyat oyunçular skamyasında əyləşənləri icarəyə götürməsindən də anlamaq olar, ötən il Qəbələdə keçirdiyi günlərdə otellərə borclu qalmasından da. Azdısa, birini də deyim. Adil Şükürov arzuladığı futbolçuları heyətə cəlb edə bilmir. Oyunçularını icarəyə vermək planı da var idi ki, sadəcə, Elnur Cəfərovu “İmişli”yə göndərə bildilər. Başqalarını istəyən yoxdu.

Yəni durum pisdi, həddən artıq pis. Hətta “Kəpəz” üçün 1-ci liqanın yolu görünür. Gəncəli futbolsevərlər əsəbləşməsin, amma reallıq belədi. Çünki “Qəbələ” keyfiyyətli legioner transfer edərək güclənməyə doğru iri addım atıb. Bəlkə birini də aldı, bilmək olmaz. Hər halda, bu yöndə axtarışların getdiyi bəllidi. Digər tərəfdən, “qırmızı-qaralar”ın oyunçuları təcrübə baxımından daha öndədi. Üçüncü məsələ isə “sarı-göylər”in ev oyunlarını təxminən iki ay Qəbələdə keçirəcəyidi. Yerli azarkeşlər məhz bu faktdan istifadə edib rəqibə təzyiq göstərmək, oyununu pozmaq qərarını versə, nə edəcəksiz? Məncə, düşünməmiş deyillər. Ortada elitada qalmaq uğrunda prinspial mübarizə varsa, niyə də olmasın?! Üstəlik “Kəpəz” azarkeşlərinin əksəriyyəti komandadan incik düşüb. Onların İdarə Heyətinin sədri İlqar Nadiridən narazılığı sosial şəbəkələri ağuşuna alıb. Mövsümün ikinci yarısının oyunlarına start verildikdə həmin narazılıqların tribunalarda özünü göstərəcəyinə əminəm. Həm də ilk məğlubiyyətdə. Ən azı reaksiyalar belə danışmağa haqq verir.

Çıxış yolu nədi? Sponsorun tapılması, azarkeşlərin komandaya sonsuz dəstəyi, kollektivin qış “transfer pəncərəsi” bağlanana qədər doğru transferlərlə gücləndirilməsi, fiziki və psixoloji hazırlığın yüksək səviyyəyə gətirilməsi və s. və i.a. Ya da bəlkə bunların heç biri... Bəlkə də Kəpəz dağı uçqunla ortaya tayı-bərabəri olmayan gözəlliklər çıxardığı kimi, “Kəpəz”də də uçqun olmalıdı. Səhv anlamayın, söhbət təbii fəlakətdən getmir! Hansısa ciddi dəyişikliklərdən gedir. Bəlkə də bu baş versə, “Kəpəz” Kəpəz qədər zəngin və Kəpəz qədər uca olacaq!

KƏNAN BAHADIR