De Byazi Qara Qarayevi qınaq obyektinə çevirdi - Əsədov, Ağayev və Diniyev niyə susur?
Çərşənbə günü AFFA İcraiyyə Komitəsinin qərarıyla Canni de Byaziylə müqavilənin müddəti uzadılmadı və yığma baş məşqçisiz qaldı.
İtaliyalı hələ vəzifəsinin başında ikən başqa ölkələrdən olan həmkarlarımızla sıx əlaqədə olur və tez-tez gərginliyə səbəb olan açıqlamalar verirdi. Gah ölkəmizi, daha dəqiq desək, yaşayış tərzini və mentallığımızı, mövcud sistemi pisləyir, gah da futbolumuzun səviyyəsiylə bağlı irad bildirirdi. Xoşagəlməz fikirlərinə görə ciddi təzyiq görməməsinin nəticəsi o oldu ki, De Byazi əndazəni aşdı və hətta idman jurnalistlərini təhqir etdi. Bu addım hər kəsin səbr kasasını daşırdı, media nümayəndələrini özündən çıxardı.
Səbəbini bilmirik, amma De Byazi Belçikada yaşananlardan sonra ya hansısa gizli qüvvənin əliylə, ya da özünü təmizə çıxarmaq məqsədiylə könüllü şəkildə yerli mətbuata müsahibə verdi. Bir tərəfdən qazandığı bərbad nəticələri öz aləmində məntiqli səbəblərlə əsaslandırdısa, guya yanlış anlaşılan bəzi məqamlara “aydınlıq gətirdisə”, iki gündü ölkə gündəmini çalxalayan açıqlama ilə də çıxış etdi. O, həmkarımızın “Qara Qarayevi niyə milliyə dəvət etmirsiz?” sualına videogörüntülərlə cavab verdi. Xatırlayırsızsa, millimiz ötən il iyunun 13-də Millətlər Liqasının 4-cü turunda Belarusla qarşılaşmışdı – 2:0. Yığmamızın qollarına Mahir Emreli və Ramil Şeydayev imza atmışdı. De Byazi məhz ikinci qolun vurulduğu anda yaşananları ictimaiyyətin yadına saldı. İddia etdi ki, Qara Qarayev həmin anlarda nəinki sevinməyib, hətta qələbəni qeyd edən komanda yoldaşlarına mane olmaq istəyib. İtaliyalı bunu indiyə qədər niyə açıqlamadığını belə izah etdi:
“Çünki mən ən əclaf futbolçularıma belə hörmətlə yanaşıram. Heç kimi alçaltmaq, azarkeşlərin gözündən salmaq fikrim olmayıb”.
Beləliklə, millimizin sabiq baş məşqçisi, nəhayət, təcrübəli oyunçuya niyə şans vermədiyini açıqladı. Bundan sonra Qara Qarayevdən açıqlama gözlənilirdi ki, sağ olsun, gözümüzü yolda qoymadı. Futbolçu srağagün axşam saatlarında sosial şəbəkə hesabında bu sözləri yazdı:
“Canni de Byazinin dedikləri, yəqin ki, öz haqqında tam məlumatın yekunu idi. Bəhs olunan videoda məntiqsiz iradı, peşəkar məşqçiyə yaraşmayan yanaşması məni təssüfləndirdi. Təqdim etdiyi videoda 7-8 oyunçu var və mən də daxil olmaqla qalanları kadrda yoxdu. Bu, o deməkdi ki, qalan bütün oyunçular millinin qoluna (qələbəsinə) sevinmirdi? Müsahibə verdiyi üçün çox sevindim. Əsassız şəkildə millidən uzaqlaşdırılmağımı onun dilindən eşitmək xoşbəxtlikdi. 10 ilə yaxın yığmada oynamışam. Yaxşı və pis çıxış etdiyim dönəmlər olub, amma hər zaman milli dəyərimiz olan formanı ləyaqətlə geymişəm!”
Belədə mövzu yenə müzakirəyə açıq qalır. Əslində Qara düz deyir. Göstərilən kadrlarda onun görüntüləri yoxdu. Bu halda məsələni araşdırmaq üçün keçmişə qayıtmağa ehtiyac duyduq. Bilindiyi kimi, De Byazinin köməkçisi Arif Əsədov da həmin oyunda idi. Onunla əlaqə sazxlayıb, hadisə anını xatırlayıb-xatırlamadığını, italiyalının yalan, yoxsa doğru dediyini soruşduq. Maraqlıdı ki, o, danışmaqdan imtina etdi:
“Hadisənin üzərindən uzun zaman keçib. İndiki halda geriyə qayıtmağın mənası yoxdu. Mən həmin an Qaranı izləməmişəm. Nə sevinməsi, nə də dilxor olması haqda nəsə deyə bilmərəm”.
Arif bəydən sonra isə həmin matçda onunla bərabər ehtiyat oyunçular skamyasında əyləşən Səlahət Ağayev və Coşqun Diniyevlə danışmaq istədik. Lakin onlar, ümumiyyətlə, sükutu pozmadılar. Görəsən, niyə? De Byazi millimizin üzvünə, ölkə futbolunun adlı-sanlı oyunçusu Qara Qarayevə böhtan atırsa, onu azarkeşlərin gözündən salmağa çalışırsa, axı niyə susasan? Böhtana qarşı mübarizə aparmaq, həqiqəti dilə gətirmək bu qədər çətin olmamalıdı! Ümumiyyətlə, həmin anda Qaranın sevincinə şahid olanlar bu gün onu qorumalı, haqq səsini yüksəltməli, futbolsevərlərin beynində şübhə toxumlarının əkilməsinə imkan verməməliydi. Nəinki susqunluq... Etinasız yanaşma... Görünür, Qara meydanda tək qaldı. Ortada, sadəcə, quru özünümüdafiə mesajı var. Millimizin üzvü haqlıdısa, yanında olmaq, daha dəqiq desək, şahidi olduğunuz anları ictimiayyətə açıqlamaq vacibdi... Haqq deyilsə, razıyıq, susun...
KƏNAN BAHADIR
Digər xəbərlər
