Hər kəs Cokoviçi favorit sayır, o isə...
Dünyanın sabiq bir nömrəli raketkası Endi Roddik gələn il keçiriləcək Avstraliya Açıq Çempionatındakı favoritini açıqlayıb:
“Yenə də proqnozum sönükdü. Mən, sadəcə, dediyimi təkrarlayacam. Novak Cokoviçin əleyhinə pul qoyuluşu etməyəcəm. Bu o anlama gəlməsin ki, başqalarının şansının olduğuna inanmıram. Bununla belə, fikrimi dəyişmək niyyətində deyiləm”.
“Football-plus.az” xəbər verir ki, avstraliyalı tennisçi Nik Kiryos da Roddikin seçimini dəstəkləyib:
“Mən də Novakı seçirəm. Hesab edirəm ki, o, Avstraliyada özünü çox rahat hiss edir. Cokoviçin oyununda enişlə bağlı heç bir əlamət görmürəm. Bu üzdən yenə də onun qalib gələcəyini düşünürəm”.
Cokoviç bu il karyerasında 10-cu dəfə Avstraliya Açıq Çempionatını qazanıb. O, finalda yunanıstanlı Stefanos Sisipası məğlub edib. 36 yaşlı serb “Böyük dəbilqə” turnirlərinin 24 qat qalibidi. 2023 mövsümünü də ATP reytinqinin ilk pilləsində tamamlayıb.
Bu arada gələnilki “Australian Open”lə bağlı bəzi detallar açıqlanıb. İlin “Böyük dəbilqə” seriyalı ilk turniri yanvarın 14-28-i aralığında keçiriləcək. Tarixdə ilk dəfə turnir 15 gün davam edəcək: bazar günü başlayacaq və bitəcək. Bu dəfə 1-ci dövrənin oyunları iki yox, “Rolan Qarros”da olduğu kimi üç gün ərzində keçiriləcək. Təşkilatçıların fikrincə, belə qərar oyunların gec bitməsi ilə bağlı idmançıların və azarkeşlərin üzərinə düşün yükün azalmasına imkan verəcək. Son vaxtlar tennis oyunlarının hədsiz uzun çəkməsi də nəzərə alınıb.
“Australian Open”də təsnifat mərhələsi yanvarın 8-də start götürəcək, əsas torun iştirakçıları isə yanvarın 11-də müəyyənləşəcək. Oyunlar ənənəyə uyğun olaraq, Melburn şəhərindəki “Melburn-Park” idman kompleksinin kortlarında keçiriləcək.
Dünya tennisinin parlamaqda olan ulduzu Karlos Alkaras Cokoviçin ATP reytinqində uzunmüddətli liderliyi haqda danışıb:
“Düzünə qalsa, bəlkə hələ 15 il də gözləməli olacam. Əlbəttə, Novakın liderliyi qeyri-adidi. Bu məqam mənə motivasiya verir, çünki Cokoviçə qalib gəlmək istəyirəm. Tarixin ən yaxşı tennisçisi olmaq istəyirəm. Ancaq eyni zamanda bu haqda düşünmürəm, çünki çox-çox çətin vəzifədi. İdmanımızın əfsanəsi çox şeyə qadirdi. Onun etdikləri inanılmazdı, bütün rekordları qırır, qatıldığı bütün turnirləri qazanır. Sadəcə, ağlasığmazdı”.
Digər xəbərlər
