"Əvvəla onu vurğulayım ki, klubda maliyyə problemi yoxdu. Çempionata başlamamış nə qədər maddi vəsait ayrılıbsa, bu gün də sabit şəkildə davam edir. Uğursuz çıxışa və baş məşqçimizin istefasına gəlincə, son anda çempionata qoşulduq. 2-ci liqaya gec qoşulmağımız da heyət sarıdan problemlərimizin olmasıyla bağlı idi. Heyətimizi komplektləşdirmədən mübarizəyə qoşulduq. Bu da öz təsirini göstərdi. Novruz müəllim komandanı toparlamaq üçün bütün gücünü, bacarığını ortaya qoydu. Amma son oyundakı nəticələrdən sonra istefa verdi. Bu o demək deyil ki, Novruz müəllim pis mütəxəssisdi və ya məğlubiyyətlərin səbəbkarı odu. Biz Novruz müəllimi dəyərli mütəxəssis hesab edirik. Gələcəkdə də "Dinamo"nun strukturu genişləndikcə Novruz müəllimin savad, bacarıq və təcrübəsindən istifadə edəcəyik. Ona başqa post veriləcək".

"Hələlik Novruz müəllimin köməkçisi Esmael Vakilighacizajani komandanı məşqlərə və oyunlara çıxaracaq. Üç oyundan sonra ilk dövrəyə yekun vurulacaq. Yalnız fasilədən sonra yeni baş məşqçi axtarışına çıxacağıq. Gələn ildən hərbi xidmət yaşı çatan futbolçuları da kluba cəlb edəcəyik. U-19 və U-21 millilərimizin üzvləri bizdə oynayacaqlar. Ona görə elə baş məşqçi seçimi etməliyik ki, ölkə futboluna fayda verəcək gənclərlə işləsin və məsuliyyətini dərk etsin".