“Bunu bacarsaq hədəfə çatacağıq”
Bu gün Misli premyer-liqasının 12-ci turunda maraqla gözlənilən "Qarabağ" - "Kəpəz" oyunu keçiriləcək.
Bilindiyi kimi, matç əslində Tovuz şəhər stadionunda keçirilməliydi. Lakin, Ağdam təmsilçisi noyabrın 9-da Bakıda Avropa Liqasının qrup mərhələsində "Bayer-04"lə (Almaniya) qarşılaşacağından PFL-ə müraciət edərək yerdəyişmə xahiş etdi. Qurum "Kəpəz"in də razılığıyla "köhlən atlar"ın müraciətini müsbət cavablandırdı. İndi Gəncə təmsilçisi ağır sınaqla qarşı-qarşıyadı. "Sarı-göylər"in aparıcı futbolçularından Abdullahi Şuaybunu müvəqqəti komandadan uzaqlaşdırdığını ötən sayımızda yazmışdıq. Daha dəqiq desək, futbolçu Hepatit B virusunun daşıyıcısıdı və bu üzdən meydana çıxa bilməz. O, hazırda vətənindədi və komandanın sıralarına nə vaxt dönəcəyi bəlli deyil. Üstəlik, "Kəpəz" ötən həftə əzəli rəqiblərindən "Turan Tovuz"la oyunda uğursuzluğa düçar oldu. Gəncəlilər 0:4 hesablı məğlubiyyətin yaratdığı psixoloji vəziyyətdən qurtulmadan ev oyununun üstünlüklərindən də məhrum oldu.
Göründüyü kimi, hər şey üst-üstə gəlir. Oyunun premyer-liqa favoriti "Qarabağ"a qarşı olması işləri daha da çətinləşdirir. Heç kim inciməsin amma, reallığa əsasən çoxu onsuz da "sarı-göylər"in bu matçda qələbəsinə şübhəylə yanaşır. Bu amillərin ön planda olduğu durumda baş məşqçi Azər Məmmədovun çıxış yolu tapıb-tapmayacağı da maraqlı mövzudu. Hər halda, "Kəpəz" azarkeşləri komandanın autsayder möqeyində olmasından narahatdı. Problemdən qurtulmağın yeganə yolu isə ardıcıl qələbələr qazanmaqdı ki, bunun üçün də tələsmək lazımdı. Hazırda "Qəbələ" 8, "Sabah" 13 xalla gəncəliləri qabaqlayır. Komanda yaxşı nəticələr qazanmağa başlamasa, xal fərqinin artacağı da istisna edilmir.
Qeyd olunanların vacib məqam olduğunu nəzərə alıb sözügedən oyunöncəsi baş məşqçi Azər Məmmədovla danışmağı lazım bildik. Mütəxəssis vəziyyətin ürəkaçan olmadığını qəbul etsə də, pozitiv danışdı:
"Turan Tovuz"la matçdan dərhal sonra bu oyunun hazırlıqlarına başlamışıq. Hamı şahiddi ki, o görüşün birinci hissəsində biz necə oyun göstərdik. Sadəcə hakim rəqibə olmayan korner verdikdən sonra qapımızda ikinci qolu gördük. Nəticədə komandada ruh düşkünlüyü yarandı və oyundan qopduq. Biz bütün qarşılaşmalara qələbə üçün çıxırıq. Futbolçularımın hər biri əzmkar və mübarizdi. Narazılıq etməyə haqqım yoxdu. Düzdü, Şuaybunun gedişi bizim üçün ağır oldu. Onun komandadakı rolu çox böyük idi. Amma bu yaxınlarda yeni hücumçu transfer etmişik. Adama Niane keyfiyyətli futbolçudu. Ümid edirəm ki, tezliklə faydalı iş əmsalını daha da artıracaq. Maksimum çalışacağıq ki, Şuaybunun yoxluğu hiss olunmasın. Ümidliyik və bizi ayaqüstə saxlayan da məhz budu. Heç vaxt məğlubiyyətlə barışmamışıq və ya oyundan öncə təslim olmamışıq. Sabah da (bu gün - red.) belə olacaq".
Çalışdırıcı oyunun məkanının dəyişdirilməsi haqda fikirlərini də bölüşdü:
"Əlbəttə, ev matçında şanslarımız daha çox olacaqdı. Azarkeş dəstəyi nəticəyə birbaşa təsir edən amildi. Düzdü, tərəfdarlarımızın Bakıda da bizi tək qoymayacağına inanırıq. Lakin, səfər görüşləri ağır olur. Bunu nəzərə alıb uyğun hazırlıqlar görürük. Birinci işimiz komandadakı ruh düşkünlüyünü aradan qaldırmaq oldu. Futbolçularla xeyli söhbət etdik. Onlar da mövcud durumun yaxşı olmadığını dərk edir və bununla barışmaq əvəzinə mübarizə aparıb reallıqları dəyişdirməyin tərəfdarıdı. Bu üzdən əminəm ki, səfərdə də əllərindən gələni əsirgəməyib qələbə uğrunda vuruşacaqlar. "Qarabağ" ölkə futbolunu dünyada layiqincə təmsil edən kollektivdi. Onların uğurlarında az da olsa pay sahibi olmaq şansı varsa, biz buna "yox" deyə bilməzdik. Belə jestləri başqa klublar da edib. Örnək addımdı. "Kəpəz" futbolumuza fayda verməkdən boyun qaçırmır".
Son olaraq, Azər Məmmədov komandasının şanslarını dəyərləndirdi:
"Düzdü, çoxu "Qarabağ"ı favorit kimi görür. Lakin, mən bütün matçlarda, rəqibin kimliyindən asılı olmayaraq "Kəpəz"i favorit olduğuna inanmışam. Bu mövsüm "Qarabağ"dan xal almışıq. Yenə azı 1 xal üçün meydana çıxacayıq. Optimal heyetlə bu işin öhdəsindən gələcəyimizə inanıram. "Qarabağ" kimi komandaya qarşı mübarizə aparırsansa, fiziki və psixoloji baxımdan tam hazır olmalısan. Məncə, bunu bacarsaq hədəfə çatacağıq".
KƏNAN BAHADIR
Digər xəbərlər
