Tanınmış idman diktoru Ramiz Qafarov vəfat edib.
"Football-plus.az" xəbər verir ki, o, Çelenc Kubokunun ”Xarı Bülbül” - “Spartak” matçı (3:1) zamanı özünü pis hiss edib. Qafarov xəstəxanaya aparılsa da, orda dünyasını dəyişib.
Mərhum son müsahibəsini "Football-plus.az"a vermişdi. Həmin müsahibəni bir daha diqqətinizə çatdırırıq:
"Azərreyl" yarandığı ilk gündən bu komandanın diktoru olmuşam. Buna görə də ölkədə məşhurlaşdım. Komandanın Avropada qazandığı uğurda da mənim də əməyim var. Bu nəticəni cənab Prezident İlham Əliyev də qiymətləndirdi. Düzdü, indi AVF-nin heyəti əlli faiz dəyişib, gəncləşdirmə gedir. Çox böyük işlər görürlər. Lakin onlar Ramiz Qafarovu tanımırlar. Bu gənclər 20 il əvvəl yaşananları unudublar. Mənim əməyimə, səsimə qiymət vermirlər. 20 il voleybol sahəsində işləyən Ramizi bu sahə ilə heç bir əlaqəsi olmayan adamla əvəz edirlər. Özüm də başa düşmürəm ki, mən sağ ola-ola, kim tərəfindənsə bura başqa adamlar cəlb olunur. Bu aparıcı (Sənan Şəfizadəni nəzərdə tutur - red.) mənim bacarmadığım nəyi bacarır? Nə etdi bu oyunlarda? Qışqırmağa qalsa, mən də bunu edə bilərəm. Bu aparıcılığın Avropada, dünyada yaradıcısı mənəm. Özü də bu sahəyə "hakim-informator" deyirlər. Heç olmasa, federasiya, "Azərreyl" rəhbərliyi məni oyuna dəvət edərdi. Bunu da eləmədilər. Hazırda dərəbəyliydi".