“Çox yaxın zamanlarda "Füzuli" futbol klubunda tutduğum icraçı direktor vəzifəsindən istefa vermək qərarına gəlmişəm. Bununla bağlı rəsmi açıqlamamız olacaq. "Füzuli"yə yeni icraçı direktor təyin olunacaq. Dişimizlə-dırnağımızla qurub yaratdığımız, bu günlərə daşıya bildiyimiz komandadan ayrılmaq qərarı vermək asan olmasa da, bəzən olur ki, klubun gələcək inkişafı, daha böyük nailiyyətləri üçün kəskin qərarlar vermək lazım gəlir. Komandanın ideya müəllifi olmuş, yaranmasında, formalaşmasında iştirak etmiş Cümşüd həkimə (Cümşüd Məmmədov) sayğıyla şükranlarımızı ifadə edirik, Allah ona rəhmət etsin, yeri cənnətlik olsun! Son altı ildə mənim üçün ən böyük hadisə rəhbəri olduğum komandanın Azərbaycan futbolunda imzalar içində imzasının olmasına nail olmaq idi - alnımızın təri, dostlarımızın fədakarlığı ilə bunu bacardıq!

Sovet vaxtı Füzuli futbolu "Ərgünəş" ilə xatırlanırdısa, müstəqilliyi bərpa etdiyimiz son 30 ilə peşəkar klub kimi məhz "Füzuli" öz damğasını vurub. İndi isə doğma "Füzuli" üçün tam fərqli səviyyədə yeni bir dönəm başlayıb. Düşünürəm ki, elə mənim üçün də yeni bir səhifə açılıb və özümü başqa bir sahədə sınamaq vaxtıdı. Ona görə də vaxt-vədə çatanda getməyi də bacarmaq lazımdı. Zərrə qədər şübhə etmirəm ki, bu gün "Füzuli"nin yeni rəhbərliyində təmsil olunan insanlar bu kollektivi zirvələrə daşıyacaqlar, ciddi uğurlara nail olacaqlar.

Füzuli rayonunda hər kəs çox yaxşı bilir ki, mən Vasif İsmayılov futbola nə qədər bağlıyam və futbolu nə qədər çox sevirəm. Hər kəs bilir ki, Füzulidə böyük futbol ayaqda qalsın deyə, son beş ildə fiziki, maddi və mənəvi olaraq verə biləcəyim hər şeyimi rayonumuzun eyniadlı komandası üçün səfərbər etdim. Bu işdə mənə kömək edən, yanımda olan hər bir kəsə tək-tək minnətdaram. Bununla qürur duyuram. Bu gün "Füzuli"nin AFFA bayrağı altında, PFL-in təşkilatçısı olduğu 2-ci liqada çıxış etməsi ilə təm əminliklə deyə bilərik ki, qarşıya qoyduğumuz missiyanın birinci mərhələsinə nail olmuşuq. Növbəti mərhələlərdə komandamızın rəhbərliyinə və futbolçularımıza uğurlar arzulayıram.

"Füzuli" az qala mənim dördüncü övladım kimidi. "Füzuli" mənim tarixim, mən də “Füzuli”nin tarixiyəm. Elə ona görə də doğma komandamıza bundan sonra da bütün qəlbimlə, həyəcanımla azarkeşlik, fanatlıq edəcəm. Hər kəsdən isə bir ricam var: haqqınızı halal edin”.