"Azərreyl" Çağırış kubokunun 1/32 final mərhələsinin ilk görüşündə Ukrayna təmsilçisi "Balta"ya qalib gəlməyi bacardı - 3:0 ( 25:18, 25:18, 25:18 ).
Oyundan sonra "dəmiryolçular"ın baş məşqçisi Cengiz Akarçeme "Football-plus.az"ın bəzi suallarını cavabladı.
- Mərhələnin birinci oyununda qalib gəldiniz. Təəssüratlarınız maraqlıdı...
- İlk oyunlar hər zaman çətin keçir. Rəqibi də yaxşı tanımırdıq. Amma gördük ki, gənc və dinamik kollektivdi. Ancaq qızlar bu matça çox yaxşı adaptasiya oldu və qələbə qazandıq. Oyunçularımı təbrik edirəm. İndi sabah daha çətin oyunumuz var. Bugünkü performansımızı sabah da göstərməliyik.
- Komandanız hesabda öndə olarkən arxayınlaşma hiss olunurdu. Bu, nə ilə əlaqədardı?
- Voleybolun qaydası belədi. Amma əsas odu ki, fərqi daha çox azaltmadan qalib gəlməkdi. Bunu qızlarımız bacardı.
- "Azərreyl"in ölkə çempionatı və avrokuboklardakı hədəfləri nələrdi?
- Hədəfimiz hər ikisi turnirdə də yüksək yerlər uğrunda mübarizə aparmaqdı. Onsuz da "Azərreyl"in yerli liqadakı məqsədi çempionluqdu. Avrokuboklarda isə finala çıxmaq istəyirik. Lakin çox güclü rəqiblərimiz var. Onların hər birinə hörmət edirik. Əlimizdən gələnin ən yaxşısını edəcəyik.
CAVİD ƏLİYEV