“Kəpəz”in müraciəti “Turan Tovuz”a çətinlik yaradıb – Nadir Nəbiyevdən açıqlama
Gəncə şəhər stadionunun yenilənəcəyindən xəbərdarsız.
“Kəpəz”in mətbuat xidmətini rəhbəri Azad Mustafayev komandanın növbəti ev oyunlarının ya lazımi təhlükəsizlik tədbirlərinin görülməsiylə həmin stadionda, ya da Tovuzda keçiriləcəyini demişdi. Redaksiyamıza daxil olan məlumata görə, “Kəpəz” bu gün ev matçlarının Tovuzda təşkili ilə bağlı “Turan Tovuz”a məktub göndərib. “Turan Tovuz”dan əsas və əvəzedici heyətin bir müddət bu klubun stadionunda oynaması xahiş edilib.
Bəs “Turan Tovuz” müraciəti necə qarşılayır? Tovuzlular “Kəpəz”ə dar günündə əl uzadacaqmı? Bu sualları klubun icraçı direktoru Nadir Nəbiyevə ünvanladıq. Onun “Football-plus.az”a söylədikləri:
“Bəli, bu gün “Kəpəz” bu mövzuyla bağlı bizə məktub göndərdi. Tezliklə idarə heyətinin iclası keçiriləcək və bəzi məsələləri müzakirə edəndən sonra yekun qərar verəcəyik. Sözün düzü, bəzi problemlər var. Bu, yalnız bir əlverişli meydançamızın olmasıyla bağlıdı. Məsələn, oktyabrın 20-si bizim, 21-i isə “Kəpəz”in ev oyunu var. 21-i həmçinin “Turan Tovuz-2”nin də ev matçı olacaq. Eyni saatlarda olmasa da, eyni gündə keçirilməsi bəzi problemlər yaradır. Təbii ki, bura “Kəpəz-2”nin də ev oyunları daxildi. Çox güman, PFL-ə oyun vaxtının dəyişdirilməsiylə bağlı müraciət ünvanlayacağıq. Ümumiyyətlə, “Kəpəz”ə yardım etmək istəyirik. Əlimizdən gələni əsirgəməyəcəyik ki, onlara müsbət cavab verə bilək. Lakin dediyim kimi, hələ yekun qərar verməmişik”.
KƏNAN BAHADIR
Digər xəbərlər
