“Raillə birlikdə dünən Sadıq müəllimi ziyarətə getmişdik. Çünki 2010-cu ildə məşqçiliyə “Neftçi”də Sadıq müəllimin yanında başlamışam. O vaxt Arif Əsədov da seleksiya məşqçisi idi. Həm də Sadıq müəllim Pro lisenziyası almaqda mənə kömək göstərib. Bilirsiz ki, Pro kateqoriyalı lisenziyanı əldə etmək üçün iki ölkəyə səfər etməlisən. Biri akademiya, digəri isə əsas komanda olmalıdı. Sadıq müəllim onda səfər pulumu ödədi. Ümumiyyətlə, təhsil almağıma çox böyük dəstək verdi. Həmişə o şəxsə böyük hörmətim olub. “Neftçi”də də gözəl nəticələr əldə elədi. Azərbaycanın keçmiş idmançıları Sadıq Sadıqovun xətrini çox istəyir. O həm bizim qardaşımız, həm də dayımızdı. Onun adı idmanın hansı növsündə varsa, deməli, orda böyük uğur olacaq. “Araz-Naxçıvan”ın oyunlarını da izləyir və hətta zəng edir, müəyyən məsləhətlərini verir. Biz də qərarlaşdırdıq ki, ona baş çəkməyə gedək. Şükürlər olsun, çox gözəl görüş oldu. Keçmişə, gözəl xatirələrə qayıtdıq. Allah Sadıq müəllimin canını sağ eləsin”.