Sabah futzal üzrə yüksək liqada cari mövsümün qalibi məlum olacaq.

“Football-plus.az” xəbər verir ki, həlledici qarşılaşmada “Neftçi” İK ilə “Araz-Naxçıvan” üz-üzə gələcək. “Qızıl” uğrunda oyun saat 18.30-da Bakı İdman Sarayında baş tutacaq.

“Neftçi”nin pley-offda “Baku Fire”ni mübarizədən kənarlaşdırdığından xəbəriniz var. “Ağ-qaralar” qələbəni “qızıl oyun”da, yəni seriyanın 3-cü matçında əldə ediblər. Sözgedən qarşılaşmda isə maraqlı məqam yaşanıb. Belə ki, komandalar fasiləyə yollananda hesab 2:2 olub. “Neftçi”nin futzalçıları yorğunluqlarını çıxaran vaxt klub rəsmilərindən biri paltardəyişmə otağına daxil olaraq müəyyən səbəblərdən matçı canlı izləməyən klubun rəhbəri Sadıq Sadıqovun telefonla onlarla danışacağını söyləyib. Sadıq bəy komanda üzvlərinə təxminən “qalib gəlməyinizi istəyirəm. Sizə inanıram. Siz bunu bacaraqsız. Həlledici oyuna yüksələcəyiniz halda yaxşı mükafat verəcəm” kimi fikir səsləndirib. Onun bu sözləri futzalçıları ruhlandırıb, əlavə motivasiya verib. Nəticədə “ağ-qaralar”a 6:3 hesabı ilə qalib gələrək, finalda “Araz-Naxçıvan”a rəqib olublar.

RƏŞAD