"Kəpəz"in İdarə Heyətinin sədri İlqar Nadiri "Səbail"lə matçdan sonra jurnalistlərin suallarını cavablandırdı...

- Komandanız 0:3 hesabı ilə məğlub oldu. Görüş haqda fikirlərinizi bilmək maraqlı olardı...
- Hesabın belə olacağını gözləmirdik. Erkən qol buraxımız oyun planına ciddi təsir etdi. İkinci qol "Səbail"in üstünlüyünü bir qədər də artırdı. Bundan sonra oyunun nizam-intzamı pozuldu. Hesab daha fərqli ola bilərdi.

- “Neftçi” və “Qarabağ”dan xallar alsanız da, digərlərinə məğlub olmusunuz. Deyəsən, ortabab rəqiblərə qarşı komandanızda motivasiya çatmır?
- Əslində, çempionatda iştirak edən komandaların hamısı bir-birindən xal almaq iqtidarındadı. “Səbail”lə görüşə də yaxşı hazırlaşmışdıq, öz meydanımızda qələbə qazanmaq istəyirdik. Bu qalibiyyət bizə çox lazım idi. Ancaq alınmadı.

- Elmir Tağıyevlə bağlı hansısa məlumatınız var? Son durumu necədi?
- Elmir zədələndi. Tam olaraq həkim müayinəsindən keçəcək.

- Azarkeşlər baş məşqçini istefaya səslədilər. Bununla bağlı nə deyə bilərsiz?
- Gəncədə belədi, nəticə olmayanda, komanda baxımlı oyun ortaya qoymayanda azarkeşlər narazı qalırlar. Mən özüm də hələ şokdan ayılmamışam. Təəssüfedici oyun idi. Komandanın meydanda nə etmək istədiyini biz özümüz də başa düşmədik.

- Futbolçuların hazırlıq səviyyəsinin aşağı olması nə ilə bağlıdı?
- Komanda təlim-məşq toplanışı keçməyib, istədiyimiz futbolçuları dəvət edə bilməmişik. Bunların hamısı nədənsə qaynaqlanır. Adətən yay fasiləsində təlim-məşq toplanışı olmalı, yoxlama görüşləri keçirilməlidi. Biz hələ indi də futbolçu axtarırıq. Haradasa 10 gün əvvəl bizə futbolçu təklif etdilər, hazırlıq səviyyəsi istənilən vəziyyətdə deyildi. Kollektiv yenidən formalaşır, zaman lazımdı. Bu zaman ərzində də itirəcəyimiz belə oyunlar olacaq.

- Oyunçu gətirə bilməməyinizin səbəbi nədi?
- 80 faiz maliyyə çatışmazlığından qaynaqlanır.

- Bu gün FİF nümayəndələri oyunda iştirak edirdi. Onlarda sponsorla bağlı hansısa irəliləyiş var?
- Biz hər gün danışırıq. Nəsə eləməyə çalışırıq. Vəziyyətdən çıxmaq lazımdı.

- Bir ara hansısa şirkətlə danışıq apardığınız barədə məlumat yayılmışdı. Bu, doğrudu?
- Azərbaycan futbolunda ictimaiyyət o qədər kiçikdi ki, adi qığılcım olanda belə hər kəs bilir. Elə bir şey yoxdu ki, onu qapalı saxlayaq. Əksinə, biz də işıqlandırılmasının tərəfdarıyıq ki, futbola gəlmək istəyən şirkət bir az da həvəslənsin, proses sürətlənsin.

- Belə söhbət gəzir ki, iş adamları “Kəpəz”ə dəstək olmaq istəsə də, şəhərdəki mühitə görə yaxın durmurlar?
- Biz istənilən mühiti, strukturu yaratmağa hazırıq. Yetər ki, gəlsinlər, komandaya ciddi dəstək versinlər. Öz adımdan söz verirəm ki, istənilən formada danışığa hazıram. Rəhbərlik səviyyəsində təmsil olunması, rəhbər olması belə mümkündü.

- Siz geri çəkilməyə hazırsınız?
- Heç bir problem yoxdu. Əsas odu ki, komanda yaxşı olsun. Burdayamsa, o demək deyil ki, komandanı əlimdə saxlayacağam, heç kimə yaxın durmağa icazə verməyəcəyəm. Gücüm çatan budu, bu qədər mübarizə apara bilirik. Şəxsən özüm müraciət edirəm, çalışıram. Komandaya dəstək olmaq istəyənləri necə lazımdısa qarşılamağa hazırıq.

- “Kəpəz”ə əlavə nə qədər vəsait lazımdı ki, normal mübarizə apara bilsin?
- Premyer-liqada iştirak edən komandanın lisenziya büdcəsi 2 milyon manatdı. Nə qədər lazım olduğu barədə dəqiq rəqəm deyə bilmərəm. Ancaq indi bu büdcə ilə çıxış edən komanda yoxdu. Premyer-liqa klublarının büdcəsi ən azı bunun ikiqatıdı.

- Akademiyada necə, müsbətə doğru irəliləyiş var?
- Akademiyada işlər yekunlaşmaq üzrədi, yaxın vaxtlarda açılış tarixi dəqiqləşəcək. Açılış tədbiri nəzərdə tutulub.

İLKİN SULTANLI, GƏNCƏ