Coşqun Diniyev atasını məmnun edib – AÇIQLAMA
Yığma Canni de Byazinin rəhbərliyi altında AÇ-2024-ün seçmə mərhələsində Belçikaya məğlub oldusa (0:1), yoldaşlıq görüşündə İordaniyanı yendi (2:1).
İtaliyalı çalışdırıcının yığmaya dəvət etdiyi futbolçular arasında Coşqun Diniyev də var idi. Karyerasını “Ümraniyəspor”da davam etdirən futbolçu hər iki matçda strat heyətində meydana çıxdı. Yarımmüdafiəçi, uyğun olaraq,, 84-cü və 67-ci dəqiqələrdə əvəzləndi.
Bilindiyi kimi, Coşqun “Səbail”in baş məşqçisi Şahin Diniyevin oğludu. “Football-plus.az” təcrübəli mütəxəssislə əlaqə saxlayıb övladının çıxışı haqda fikirlərini öyrəndi:
“Coşqunun oyun tərzini çox bəyəndim. Məni yaxşı mənada təəccübləndirdi. Meydandakı mübarizəsiylə sübut etdi ki, Türkiyəyə keçid onun üçün uğurlu olub. Performansında xeyli irəliləyiş var. İstər fiziki, istərsə də psixoloji hazırlığı yüksək səviyyədə idi. Üstəlik Belçika kimi komandaya qarşı elə oyun göstərmək təqdirəlayiqdi. Təbii ki, sözlərim, sadəcə, Coşquna aid deyil. Ümumiyyətlə, müdafiə xətti çox güclü oynadı”.
Diniyev övladının buraxılan yeganə qoldakı səhvini belə dəyərləndirdi:
“Səhvsiz futbolçu yoxdu. Təbii ki, olmasaydı, daha yaxşı olardı. Məncə, bir neçə nəfərin səhvi üzündən qol buraxdıq. Bunlar həm Coşqun, həm Aleksey İsayev, həm də Şahruddin Məhəmmədəliyevdi. Onlardan biri nəyisə düz etsəydi, nəticə başqa cür olardı”.
KƏNAN BAHADIR
Digər xəbərlər
