"Mahirin yığmamızda zəif çıxışıyla bağlı çox fikir səsləndirmək olar. Amma onlar sırasından ən obyektivləri seçsək, deyərdim ki, Mahir fərdi oyuna üstünlük verən oyunçudu. Bu da komanda oyununda məhsuldarlığı aşağı salır. Baxmayaraq ki, milli üzvü Avropada transfer olunduğu klublarda özünü yaxşı tərəfdən göstərir. Ancaq yığmada onun kreativliyini görmürük. Bundan başqa, Mahirin sərgilədiyi oyun tərzi digər oyunçularla uyğun gəlmir. Yəni o, millidəki komanda yoldaşları ilə ansambl yarada bilmir. Həmçinin "10 nömrə" meydanda hədsiz ehtiyatlı çıxış edir. Düşünürəm ki, bunun əsas səbəbi zədələnmədən çəkinməsidi. Təbii ki, bu mənim qənaətimdi. Başqa yanaşmama görə isə Mahir baş məşqçilərdən daim diqqət-qayğı, əlavə motivasiya gözləyən futbolçudu. Görünür, o, De Byazinin komandada yaratdığı ab-havaya uyğunlaşa bilmir. Yığmada elə bir baş məşqçi olmalıdı ki, ölkənin əsas komandasında oynamağın, mübarizliyin ən müsbət tərəflərini futbolçulara aşılasın. Mahir də belə, fərdi yanaşmanı sevən oyunçulardandı. Bəzən məşqçilər Mahirlə ayrıca, fərdi şəkildə söhbət etməlidi. Həmçinin sabiq "Qarabağ"lının hücumun sivri ucunda yer alması da ayrıca vurğulanmalıdı. Bu elə mövqedi ki, başqa oyunçular onu müntəzəm topla təmin etməlidi. Təbii ki, bu mövqedə çıxış edən oyunçunun fərdi keyfiyyətləri də rol oynayır. Amma görünən odu ki, Mahirin hələ komanda yoldaşları ilə meydanda rabitəsi uzlaşmır. Həmçinin Emrelini irəlidə oynayan başqa forvardlardan, əsas da Ramil Şeydayevdən fərqləndirən cəhətlərdən biri də odu ki, o, yarımmüdafiə və müdafiəyə kömək üçün geri çəkilmir. Yəni meydanın mərkəzində və komandasının özünə aid hissəsindəki dərinliyə qədər gələrək top qazanıb onu irəliyə daşımağı Mahirin ifasında görmürük. Sadaladıqlarıma əsasən Zaqreb "Dinamo"sunda oynayan həmyerlimizin hələlik yığmaya faydası görünmür".