Birinci Avstriya toplanışını başa vurduqdan sonra vətənə qayıdan və yeni mövsümə hazırlığı öz bazasında davam etdirən ''Qalatasaray'' srağagün növbəti yoxlama oyununu keçirib.

Bu dəfə ''Cim-Bom'' doğma ''Nef Stadionu''nda ''Kasımpaşa'' ilə qarşılaşıb. Həm baş məşqçi Okan Buruk, həm də yeni transferlər ilk dəfə doğma meydanda fanatların önünə çıxıblar. Azarkeşlər oyuna heç də az maraq göstərməyib. Qarşılaşmanı stadiondan 18 min tərəfdar izləyib. Okan Buruk bu heyəti meydana buraxıb: Muslera, Elabdellaui, Nelsson, Əbdülkərim Bardakçı, Van Anholt, Berkan Kutlu, Oliveyra, Yunus Akgün, Əmrə Akbaba, Kərəm Aktürkoğlu, Qomis.

İlk yarı 6 dəqiqə aralığında vurulan qarşılıqlı qollarla bərabərliklə başa çatıb. 28-ci dəqiqədə Kərəm Aktürkoğlu uzaq məsafədən vurduğu mükəmməl qolla hesabı açıbsa, 6 dəqiqə sonra qonaqların kapitanı Hayradinoviç bu qola cavab verib. ''Sarı-qırmızılar'' ümumilikdə pis təsir bağışlamasalar da, müdafiədə yol verilən səhvlər gözdən qaçmadı. Sadəcə, ''Kasımpaşa''nın hücum oyunçuları fürsətlərdən yararlana bilmədilər. Buruk ikinci yarının gedişində qapıçı Musleradan başqa bütün oyunçuları əvəzlədi. 61-ci dəqiqədə meydana daxil olan yeni transferlər - Dyubua və Seferoviç qısa müddət ərzində özlərini yaxşı tərəfdən göstərməyi bacardılar. Sağ cinahda fəallığı ilə seçilən fransalı oyunçu bu mövsüm komandaya böyük fayda verəcəyini göstərdi. Seferoviçin debütü isə gözləniləndən də uğurlu alındı. Təcrübəli forvard meydana çıxdıqdan cəmi 5 dəqiqə sonra müdafiəçilərin səhvindən sonra qapıçı ilə təkbətək çıxdı və sol ayağı ilə soyuqqanlı şəkildə topu yaxın küncə göndərdi.

Bu qol maraqlı bir təsadüfü üzə çıxardı. Belə ki, Radamel Falkao da ''Qalatasaray'' karyerasında ilk qolu ev oyununda ''Kasımpaşa''nın qapısına vurmuşdu! Üstəlik həmin qol da qələbə qolu olmuşdu. 2019/20-nin 4-cü turunda, konkret desək 2019-cu ilin sentyabrın 13-də Falkaonun debüt qolu sayəsində ''Aslan'' bu rəqibini 1:0 hesabı ilə məğlub etmişdi. Qeyd edək ki, komanda bu yay keçirdiyi 5-ci hazırlıq oyununda cəmi 2-ci qələbəsini qazandı (1 heç-heçə, 2 məğlubiyyət). ''Qalatasaray'' bu gün yenidən Avstriyaya yollanaraq orda keçirəcəyi 2 oyunla hazırlıq dönəmini başa vuracaq. Komanda sabah ''Salernitana'', iyulun 31-də isə İtaliyanın digər təmsilçisi ''Fiorentina'' ilə qarşılaşacaq. ''Qalatasaray'' superliqada yeni mövsümə avqustun 7-də səfərdə ''Antalyaspor''a qarşı oyunla start verəcək.

ƏLİ