“Real” aparıcı oyunçularından birini itirib. “Selta” üzərində qələbə (1:0) madridlilərə baha başa gəlib.

"Football-plus.az" xəbər verir ki, komandanın aparıcı futbolçusu Vinisius Junior zədələnib. O, La Liqanın 3-cü turunun oyununun 10-cu dəqiqəsində xəsarət alıb.

Braziliyalı hücumçu oyuna davam etməyə çalışsa da, bir neçə dəqiqə sonra ağrı hiss edib və Xoselu ilə əvəzlənib. Baş məşqçi Karlo Ançelotti ilkin açıqlamasında Vinisiusun “Xetafe” ilə növbəti oyunu buraxacağını deyib. Onun milli komandaların oyunları ilə bağlı sentyabrda nəzərdə tutulan fasilədən sonra sıraya dönəcəyi ehtimal edilirdi.

Lakin zədə ehtimal olunandan da ağırdı. Müayinə nəticəsində əzələsi ciddi şəkildə dartılan futbolçunun ayyarım futbol oynaya bilməyəcəyi müəyyənləşib. Junior La Liqada “Xetafe”, “Real Sosyedad”, “Atletiko”, “Las Palmas” və “Jirona”ya qarşı oyunları və Çempionlar Liqasında bir matçı buraxacaq. O, eyni zamanda Braziliya millisinin sentyabrda keçirəcəyi oyunlarda da iştirak edə bilməyəcək.