“Ortaya yaxşı iş qoymaq niyyətindəyik. Ölkə futbolunun inkişafına töhfə verməyi hədəfləmişik. Düzdü, rəqiblərimiz çoxdan heyətini formalaşdırıb, stadionunu hazır vəziyyətə gətirib. Amma bu bizi qorxutmur. Nə də tələsmirik. Qarşıda bizi çətin günlərin gözlədiyinin fərqindəyik. Amma bir yerdən başlamalıydıq. “Dinamo” tarixi olan klubdu. Bizə işləri yola vermək, keyfiyyətsiz çıxış yaraşmaz. İlk mövsüm üçün böyük məqsədimiz yoxdu. Sadəcə, yaxşı oyun göstərib tərəfdarlarımızı sevindirməyə çalışacağıq. Elə indi komandanın məşqini izləyirəm. Abşeron Olimpiya Kompleksində yığışmışıq. Baş məşqçimiz Novruz Əzimov futbolçularla çalışır. Yeri gəlmişkən, Novruz bəy “Neftçi”nin veteran futbolçusu olmaqla yanaşı, həm də 1990-cı illərdə mənimlə bərabər “Dinamo”nu yaradanlar sırasında idi. Məşqlərdə özünü yaxşı tərəfdən göstərənlərlə müqavilə bağlayacağıq. Hələ ki heç bir futbolçuyla münasibətləri rəsmiləşdirməmişik. Bilirsiz ki, daha bacarıqlı oyunçular artıq özlərinə klub tapıblar. Demək olar ki, yerdə heç nə qalmayıb. Yeganə yolumuz Bakıdakı akademiyalara müraciət etməkdi. Tanıdığımız, oyununa bələd olduğumuz gəncləri bir yerə yığmağa çalışacağıq. Bu yaxınlarda stadion və maliyyə məsələlərini həll edəcəyik”.