Frants Bekkenbauerin səhhətində neçə vaxtdı problem yaranıb.

“Football-plus.az” xəbər verir ki, Almaniya millisinin və “Bavariya”nın əfsanəvi futbolçusu bu səbəbdən uzun müddətdi ictimaiyyət içində gözə dəymir.

Dünya futbolunun canlı əfsanəsi 2016-cı və 2017-ci illərdə ürəyində əməliyyat keçirib, 2019-cu ildə onun bud nahiyəsinə protez qoyulub. 77 yaşlı futbol veteranı son vaxtlar özünü yaxşı hiss etmədiyi üçün ictimai tədbirlərdə görünməyib. Məsələn, o, Qətərdə keçirilən dünya çempionatına yollanmamış, bu ilin yanvarında aha bir futbol əfsanəsi Pelenin dəfn mərasimində iştirak etməmişdi. Bekkenbauerin iyulda DÇ-1990-da qalib gələn Almaniya yığmasının keçmiş məşqçi və oyunçuları ilə keçirilən görüşü buraxdığını da qeyd edək.

Onun səhhətində neçə vaxtdı problemlərin olduğunu RTL telekanalına açıqlamasında yığmanın keçmiş kapitanı Lotar Matteus bildirib. O, hazırda “Kayzer Frants”ın vəziyyətinin heç də yaxşı olmadığını deyib və ona şəfa diləyib.

Xatırladaq ki, Bekkenbauer bundestimin heyətində 1972-ci ildə Avropa, 1974-cü ildə dünya çempionu olub. O, “Qızıl top” mükafatının ikiqat sahibidi.