Vətəndə lazım olmadı, Kosovoya getdi - AÇIQLAMALAR
Araz Abdullayev qəribə adam və qəribə futbolçudu. Söhbət heç də onun keşməkeşli şəxsi həyatından getmir. 2022/23 mövsümündə şərəfini qoruduğu “Sumqayıt”dan ayrılandan sonra uzun müddət işsiz qaldı. Və srağagün qəfil karyerasını Kosovonun "Llapi" klubunda davam etdirəcəyi bəlli oldu.
"Football-plus.az" xəbər verir ki, Abdullayev İngiltərə, Yunanıstan, Cənubi Kipr və Türkiyənin ardından daha bir ölkədə özünü sübut etməyə çalışacaq. Kosovo təmsilçisi rəsmi səhifəsində transferlə bağlı bunları paylaşıb:
"Arazın klubumuza transferini salamlayır, onun böyük təcrübəsinin komandamıza daha yüksək uğur gətirəcəyinə inanırıq”.
1932-ci ildə yaradılan “Llapi” Podujeva şəhərini təmsil edir. Elə də zəngin tarixə malik deyil. İki dəfə Kosovo superliqasının bürünc medallarını qazanıb, iki dəfə də ölkə kubokunun qalibi olub. Ev oyunlarını 5 min yerlik şəhər stadionunda keçirir. Yeri gəlmişkən, “Llapi” sözü albancadan tərcümədə “laboratoriya” deməkdi.
Araz vətəndə heç kimə lazın olmadı. Baxmayaraq ki, zəngin karyerası var. Bəs yığmamızın sabiq üzvünün zəif Kosovo çempionatına keçidi geriyə addımdı, yoxsa növbəti özünüsübut istəyi? Bu suala təcrübəli menecerlərin reaksiyasını öyrəndik.
Erkin İbrahimov:
"Arazın bu yaşda Kosovo çempionatına yollanması nə uğurdu, nə də uğursuzluq, adi bir reallıqdı. Amma sevindirici məqam odu ki, bu yaşda da millimizin sabiq üzvündə oynamaq eşqi ölməyib. Arazı səciyyələndirən əsas cəhətlərdən biri ölkə xaricinə çıxmaqdan heç vaxt qorxmamasıdı. Zəngin təcrübəyə malik oyunçudu, inanıram ki, yazın günlərdə yeni klubunda debüt edəcək və özünü yaxşı tərəfdən göstərəcək. Ona uğurlar arzulayıram".
Tural Əsgərov:
"Araz Abdullayevin karyerasını bitirməsi gözlənilirdi. Amma futbolçu yenə də oynamağı üstün tutdu, karyerasını davam etdirəcək. Bir müddət klubsuz da qalmışdı. Görünür, Azərbaycanda heç bir kluba lazım deyil. Millimizin sabiq üzvünün Kosovo təmsilçisinə keçidini uğur və ya uğursuzluq adlandırmaq olmaz. Bu, sadəcə, keçiddi. Araz hələ də top arxasınca qaçmaq istəyirsə, ona uğurlar arzulamaq qalır".
ABDULLA İSMAYILOĞLU
Digər xəbərlər
