"Haqqımızda yazılanlar həqiqəti əks etdirmir. Kimlərsə bizimlə bağlı qara piar aparır. Öncəliklə futbolçuların komandamızı tərk etməsi məsələsinə toxunum. Bəzi "oyunçular" komandadan gedib. Bu da onların pula hərisliyi ilə bağlıdı. Belə ki, bəzi özünü "menecer" kimi təqdim edənlər bizə bir qrup futbolçu təqdim etmişdi. Biz də onları yoxlayandan sonra müqavilə bağladıq. Daha sonra həmin top qovanlar psevdomenecerlər vasitəsilə qiymətlərini qaldırmaq üçün bizə şərt qoydular ki, "başqa klublar 50-100 manat artıq məvacib virir, ora keçmək istəyirik. Amma siz maaşımıza bir o qədər artım etsəz, qalarıq". Biz də bu tip "futbolçular” ilə davam etməmək qərarına gəldik. Sonra bəlli oldu ki, artıq məvacib həvəsində olanlar bir qədər çox pul verən klublara da qoşula bilməyib. Yoxlama görüşləri də keçiririk. Zatən sınaq matçları üçün elə də böyük maddiyyat lazım deyil. Hazırda bütün gücümüzlə mövsümə hazırlaşırıq. Stadionda təmir və yenidənqurma işlərimiz davam edir. Arenada suvarma sistemi qurulub. Qaçış zolağı rənglənib. Paltardəyişmə və hakimlər otaqları, duş kabinələri təmir olunub. İndiyədək əsas problem süni qazonla bağlı idi, onun da çatışmazlıqları aradan qaldırılıb. Mövsümün startına kimi yerdə qalan işləri də tamamlayacağıq. Odu ki, nə maliyyə problemimiz var, nə də bu kimi başqa sorunlarımız".

"Stadionumuzda işlər, demək olar, yekunlaşıb. İsti-soyuq su məsələsi, hakimlər və futbolçuların paltardəyişmə otaqları və s. həll olunub. Ot örtüyümüz, demək olar, hazırdı. Hazırda təftiş komissiyasını gözləyirik. Heyətimizə 8 yeni oyunçu cəlb etmişik. Yaxın günlərdə onlar rəsmi şəkildə açıqlanacaq. Yerdə qalan 13-14 futbolçu da yerli uşaqlarımız olacaq. Bundan başqa, ehtiyat meydançamız da tikilməkdədi. 1-1,5 aya orda iş yekunlaşacaq. Üç yoxlama oyunu keçirmişik. Səfərdə "Zaqatala" ilə 2:2 etdik. Sonra doğma meydanda onlara 1:2 hesabıyla uduzduq. Həmçinim evdə "Qala-Şəmkir"i də 2:1 məğlub etdik. Yəni bacardığımız qədər çempionata hazırlaşırıq".

"Hazırlıq normal şəkildə gedir. Üç yoxlama oyunu keçirmişik. Hazırda "Araz-Saatlı" ilə 4-cü görüşümüzə hazırlaşırıq. 1-ci liqanın püşkatmasını gözləyirik. Püşkatmanın nəticəsini bilinəndən sonra ola bilsin daha iki sınaq matçı keçirdik. Yetirmələrimdən razıyam. Meydanda vəzifələrini yaxşı görür, məsuliyyətlərini anlayırlar. Stadionumuzda da bütün işlər yekunlaşmaq üzrədi. Yalnız yeni bazamızla bağlı işlər davam edir. O da ən geci iki aya hazır olacaq. Qalan işlər hamısı qaydasındadı".