“İstifadə edə bilmədiyimiz fürsətlər çox oldu”
"Qarabağ" Avropa Liqası 3-cü təsnifat mərhələsinin Bakıda keçirilən ilk oyununda Finlandiyanın HİK klubunu 2:1 hesabı ilə məğlub edib.
"Football-plus.az" xəbər verir ki, matçdan sonra keçirilən mətbuat konfransında Ağdam təmsilçisinin baş məşqçisi Qurban Qurbanov jurnalistlərin suallarını cavablandırıb. Sizi mütəxəssisin fikirləri ilə tanış edirik:
"Futbolçularımı qalibiyyət münasibətilə təbrik edirəm. Ciddi rəqibə qarşı mübarizədə vacib qələbə qazandıq. Matç yetərincə gərgin keçdi. Hava çox isti idi. Futbolçular belə şəraitdə sona qədər dözdü. Azarkeşlərimizə isə xüsusi təşəkkür düşür. Başdan sona qədər dəstək göstərdikləri üçün minnətdaram".
- Nə hesabda öndə olarkən, nə də matç bitdikdən sonra sevincli idiniz. Bunu rəqibin qapıya bütün zərbələrinin dəqiq olması ilə əlaqələndirmək olar? HİK-in təxminən 7 zərbəsi oldu ki, hamısı "çərçivə"yə idi. Deyəsən, bu sizi qayğılandırdı...
- Düzü, rəqibin zərbələrini saymadım. Fikrim daha çox komandamda idi. Öz qol epizodlarımız daha əsasdı. İstifadə edə bilmədiyimiz 100 faizlik fürsətlər çox oldu. Futbolçuları başa düşürəm. İstər-istəməz gərginlik var idi. İnşallah, cavab matçında tam əksi olar. Daha yaxşı oyun göstərib qol epizodlarından istifadə edərik. Üzümüz həmişə gülür, problem yoxdu.
- Bir qol fərqi nə dərəcədə üstünlük verir? "Qarabağ"ın pley-off şansı nə qədər artdı?
- Qələbə istənilən halda üstünlükdü. Hər qalibiyyət futbolçulara inam verir. Qol buraxandan sonra qol vurmaq çox vacib idi. Rəqibin qolundan sonra oyunçular ruhdan düşə bilərdi. Yaxşı ki, zaman irəlilədikdə oyunu ələ aldılar. İndiki halda rəqibdən qismən üstünük.
- HİK haqda ikinci "Rakuv" demişdiniz. Bu gün bunu görə bildiniz? Fikriniz dəyişməyib ki?
- "Rakuv"dan güclü və ya zəif olduqlarını dəqiq deyə bilmərəm. Ümumi oyun modeli olaraq çox bənzəyirlər. Bu arada, "Sabah"ı qələbə münasibətilə təbrik edirəm. İnanıram ki, cavab oyununda da yaxşı nəticə əldə edib ölkəmizin reytinq xalını artıracaqlar.
- Finlandiyaya yolun uzaqlığını, havanın burdan fərqli olmasını nəzərə alsaq, səfərə erkən çıxmağı planlaşdırırsınız?
- Yox. Bir gün əvvəl gedəcəyik.
- Uzun zamandı ki, Tofiq Bəhramov adına Respublika stadionunda oynamırdınız. Matçdan əvvəl deyəsən bu haqda hansısa stadion rəsmisi ilə söhbətiniz baş tutdu. Ona nə dediniz? Qazon sizi qane etdi?
- Bəli, yaxşı idi. Məşqdən sonra bəzi şeyləri stadion əməkdaşlarına demişdim. Sağolsunlar, hər şey həll edilmişdi.
KƏNAN BAHADIR
Digər xəbərlər
