Sabah "Qarabağ" Avropa Liqasının 3-cü təsnifat mərhələsinin ilk oyunu çərçivəsində HİK-i qəbul edəcək.

Bu gün oyunöncəsi mətbuat konfransında ağdamlıların baş məşqçisi Qurban Qurbanov jurnalistlərin suallarını cavabladı:

- HİK-in Bakıya səfər planı dəyişdi. Sərin Skandinaviyadan gəlirlər, Bakının 45 dərəcə istisi onlara təsir edər?
- Deyə bilmərəm. Bu formada suallar çox olub. Dəfələrlə demişəm ki, daha sərin havada futbolçunun idman forması daha tez yüksəlir. İstər-istəməz uyğunlaşma üç gündən sonra başlayır. Onların planlarının dəyişməsinə gəlincə, səbəbini bilmirəm. Bu barədə düşünməmişik. İnanmıram ki, bir günlük isti, ya gecikmə oyun planına təsir etsin. Fikrimiz rəqibi yaxşı təhlil etmək, hazırlaşmaqdı.

- Son vaxtlar məğlubiyyətlər komandada psixoloji gərginlik yaradıb. Sabahkı oyun psixoloji gərginliyi düzəltmək üçün yaxşı şansdı. Bu, əlavə gərginlik yaradır?
- Desəm ki, olmayacaq, yalan olar. Amma biz peşəkarıq, belə hallarla üzləşmişik. İllərdi bu yolla gəlirik.Mənim narahatlığım yoxdu. Bilsəm ki, komandam oyununu itirib, gücü yoxdu, potensialı zəifləyib, narahat olaram. Yox, biz heç bir rəqibdən çəkinmiriksə, onlara qalib gəlmək gücündə olduğumuzu biliriksə, deməli, narahatlıq yoxdu. Amma hər məğlubiyyətdən, düşünmədiyimiz hesablardan sonra gərginlik hiss olunur. Yaxşı oyun göstərmək istəyirik. Bəlkə də sürət və dinamika istədiyimiz kimi olmayacaq. Amma 90 dəqiqə oyuna köklənib, səhvlərdən uzaq olmaq niyyətindəyik.

- Yenə “Tofiq Bəhramov”da oynayacaqsız. Bu məqam ümumi vəziyyətə hansı dərəcədə təsir edəcək?
- Ola bilər. Amma əvvəl də demişdim ki, bizim üçün Bakının hər yeri doğmadı. Əlbəttə, “Tofiq Bəhramov”a daha yaxşı tanışıq. Orda da çoxdan oynamırıq. Stadionun durumu yaxşı idi. Məşqimizi etmişik. İnanıram ki, faydası olacaq.

- İki il əvvəl HİK "Neftçi" ilə oynamışdı. Klub indi heyətdə dəyişikliklər edib. Sizcə, oyunlarında dəyişiklik var?
- Keçmişə çox da baxmadıq. Futbol elə səviyyəyə gəlib ki, ildən-ilə dəyişikliklər olur. Bugünkü komandanın durumu ilə yaxından tanış olmağa çalışdıq. Zamanla hər komandanın təcrübəsi artır. Düşüncəmiz sırf bugünkü HİK-lə bağlıdı. Bu komandanın təhlükəli oyunçuları, hücumları var. Onlara diqqət ayırmışıq.

- Hansısa futbolçunun zədəsi var? Əsas heyətlə bağlı dəyişiklik gözlənilir?
- Futbolçuların durumu pis deyil. Ciddi problemi olan oyunçu yoxdu. Zədəliləri bilirsiz. Son çempionat matçında oynayan futbolçularda mikro zədələr var. Bunun bizə mane olacağını düşünmürəm. Matçda daha yaxşı səviyyədə olacaqlar. Hələ ki ciddi dəyişiklik gözlənilmir.

- HİK-dən gözlədiyiniz ən böyük təhlükə nədi? Hansı tədbirləri görəcəksiz?
- Burada desəm, düzgün çıxmaz. Amma rəqibin çox yaxşı kollektiv müdafiə xətti var. "Rakuv"un oyun üslubuna yaxın oynayırlar. Sürətli oyunçularının sayı çoxdu. Bunda diqqətli olmalıyıq. İstənilən rəqibə qarşı öz oyunlarını rahat diqtə edə bilirlər.

- “Rakuv”la oyundan və “Zirə”yə məğlubiyyətdən sonra sanki üzərinizdə təzyiq daha çox oldu, tənqidlərə məruz qaldız. Geridə qalan bir həftəni necə keçirdiz?
- Mən Bakını, vətənimi çox sevirəm. Biz hamımız bu vətənin övladlarıyıq. Danlayırlarsa, narazılıq edirlərsə, bunu övlad kimi düzgün qəbul edirik. Biz də vətən üçün çalışırıq ki, məsuliyyətli olaq. Bacardığımızdan da artığını etməliyik ki, vətənimizə, xalqımıza az da olsa, faydamız dəysin. Bunu həmişə şərəflə yerinə yetirməyə çalışmışam. Sırf bu məsələ haqda çox da fikir bildirmək istəmirəm. Normal hallardı. Mən azərbaycanlılarımı və vətənimi çox sevirəm.

KƏNAN BAHADIR