"Neftçi" azarkeşlərinin qəlbində özünəməxsus yeri olan futbolçulardan biri də Flavio Aleks Valensio və ya sadəcə, Flavinyodu.

2010-15-ci illər aralığında “ağ-qaralar”ın formasını geymiş, üçqat Azərbaycan çempionu, ölkə kubokunun ikiqat qalibi olan braziliyalı ilə əlaqə saxlayıb, ötən günləri yada saldıq.

- Flavinyo, işlərin necədi, indi hansı işlə məşğulsan?
- Bu ay “AF Sports” adlanan layihəyə başlayıram. İstedadlı uşaqların inkişafı üçün futbol məktəbləri ilə işləyəcəm.

- Bu layihəni Azərbaycana gətirmək fikrin varmı?
- Təəssüf ki, hazırda "Neftçi" ilə heç bir əlaqəm yoxdu. Amma istəyərdim ki, sabiq komandama kömək edim. Onlar mənə bu şəraiti yaratmadılar. Ümid edirəm ki, Sadıq Sadıqov yenidən prezident postuna qayıdar və mən də bu layihəni Azərbaycanla bölüşərəm.

- Kimlər sənə şərait yaratmadı?
- Dünya futbolunda, ölkəm Braziliyada keçmişdə komandayla titullar qazanmış futbolçulara hörmət edirlər, onları kluba qaytarırlar. Lakin "Neftçi"də belə bir şey olmadı.

- Bəs xoşbəxt olduğun "Neftçi"dən getməyinə səbəb nə oldu?
- Sadıq Sadıqov klubdan ayrılandan sonra yeni vitse-prezident (Elnur Məmmədovu nəzərdə tutur – red.) mənə keçmiş rəhbərliyin göstərdiyi hörməti qoymadı. Özünü klubun prezidenti kimi aparırdı. Buna görə də "Neftçi"dən ayrıldım.

- "Neftçi"dən incimisən?
- Xeyr! Mən "Neftçi"ni sevirəm. O komandanın heyətində böyük uğurlar qazanmışam. Bunları unutmaq çətindi. O zamankı prezidentimiz Sadıq Sadıqov mənə demişdi ki, karyeranı bitirəndən sonra "Neftçi"yə qayıdarsan. İndi bu arzumu reallaşdırmaq istəyirəm.

- Azərbaycanı, "Neftçi"ni necə xatırlayırsan?
- Karyeramın ən gözəl anlarını "Neftçi"də keçirmişəm. Bakı ilə bağlı gözəl xatirlərim var. Həqiqətən də Azərbaycanın ürəyimdə yeri başqadı.

- "Neftçi" ilə bağlı ən unudulmaz xatirən hansıdı?
- Düşünürəm ki, klubla qazandığımız bütün titullar, eləcə də Avropa Liqasının qrup mərhələsində iştirakımız, "İnter"ə qarşı unudulmaz oyunlarımız… Hələ də ölkənizdə APOEL-ə qarşı keçirdiyimiz oyunları xatırlayırlar. "Neftçi" ilə bağlı xatirəm çoxdu. Karyeramın ən gözəl illərini o komandanın heyətində keçirmişəm.

- Son illər "Neftçi" əvvəlki gücündən uzaqdı. Bunun səbəbi nədi? Səncə, "ağ-qaralar" yenidən keçmiş günlərinə qayıtmaq üçün nələr etməlidi?
- "Neftçi" yanlış rəhbərlik tərəfindən idarə olundu. Keçmişdə komanda ilə uğurlar qazanmış futbolçular arxa plana atıldı. Uğur qazanmaq üçün rəhbərlik, məşqçi və futbolçular keyfiyyətli olmalıdı. Son illərdə "Neftçi"də eyni maraqlar üçün birlikdə işləyən bir ailə yoxdu.

- "Xəzər Lənkəran"la oyunları necə xatırlayırsan?
- Əla idi. Həmin matçlarda qol vurmaq şansım çox olurdu. Lənkərandakı qarşılaşmalar lap gərgin keçirdi.

- Azərbaycanın ən böyük baş məşqçilərindən biri olan Böyükağa Hacıyevlə birlikdə çalışmısan. Onu necə xatırlayırsan?
- Böyükağa müəllim bənzərsiz məşqçi idi. Birlikdə böyük uğurlar qazandıq. Onun kimi bir mütəxəssis olmayacaq.

- Sanki “Neftçi”dən sonra karyeranda eniş yaşandı...
- "Neftçi"dən sonra "Şapekoense" və CRB-də çıxış etdim. Karyeram pis alınmadı. Bu klublarda yaxşı oyunlar keçirdim.

- Sizin dövrünüzdəki "Neftçi"nin uğurunun sirri nədə idi?
- Həmin "Neftçi" bir ailə kimi idi. Hamı bir-birinin qayğısına qalırdı. Bunun nəticəsində də biz uğurlar qazanırdıq.

- "Neftçi"dən kimlərlə əlaqən var?
- Böyük prezidentimiz Sadıq Sadıqovla, klubda işləmiş bəzi dostlarla hələ də danışırıq.

- "Neftçi" azarkeşləri səni unutmayıb. Onları necə xatırlayırsan?
- Demək olar ki, hər gün "Neftçi" azarkeşlərindən mesaj alıram. Bu da məni çox xoşbəxt edir. Onlar üçün darıxıram.

- Nə vaxtsa Azərbaycana gəlməyi planlaşdırırsan?
- Mən Azərbaycan səfər etmək istəyirəm. Ordakı dostlarımla görüşüb, "Neftçi"nin oyunlarını izləmək arzumdu. İnşallah, bir gün ölkənizə gələcəm.

CAVİD ƏLİYEV