"Qarabağ" Avropa Liqasının 3-cü təsnifat mərhələsində Finlandiya təmsilçisi HİK-lə üz-üzə gələcək. “Football-plus.az” xəbər verir ki, "Molde”yə Çempionlar Liqasında iki oyunun nəticəsinə görə 1:2 uduzan komanda mübarizəni Avropanın 2-ci dərəcəli klub turnirində davam etdirəcək.

HİK-in fin dilində adı “Helsingin Jalkapalloklubi”di. Mənası “Helsinkinin futbol klubu” deməkdi. Əsası 1907-ci ildə qoyulub, ölkənin ən köklü klubu sayılır. Hazırda 10770 yerlik “Bolt” arenasında çıxış edir. Komandanın baş məşqçisi Toni Koskela 2019-cu ildən burda çalışır. 38 yaşlı məşqçinin güclü futbolçu karyerası olmayıb. Çıxış etdiyi ən məşhur klub Norveç “Molde”sidi. Baş məşqçi kimi “Rops”da bir mövsüm uğurlu nəticə göstərəndən sonra əvvəllər 19 yaşlılardan ibarət komandasında çalışdırıcı işlədiyi HİK-ə qayıdıb.
Klub prezidenti Olli-Pekka Lyitikaynen həm də “A-lehti” şirkətinin rəhbəridi. Onun atası Olli də bu klubun prezidenti olub. HİK hazırda davam edən ölkə çempionatında 12 komanda arasında 3-cü pillədə qərarlaşıb. Heyətdəki 27 futbolçudan 6-sı legionerdi. Klubun büdcəsi 7,45 milyon avrodu. Ən dəyərli futbolçusu isveçli Filip Roqiçdi. 30 yaşlı mərkəz yarımmüdafiəçisinin qiyməti 750 min avrodu.

HİK-in heyətində ən təhlükəli futbolçu Boyan Raduloviçdi. O, 24 qarşılaşmada 13 qol vurub.
HİK Finlandiyanın futbol flaqmanıdı, 31 dəfə ölkə çempionu olub ki, du da ölkə tarixində ən yüksək göstəricidi. 14 dəfə ölkə kubokuna, 5 dəfə Superkuboka yiyələniblər. Finlandiyanın Çempionlar Liqasının qrup mərhələsində iştirak edən yeganə təmsilçisidi. 1998-ci ildə bu turnirin pley-offunda “Mets”i mübarizədən kənarlaşdıran “göy-ağlar” avrokuboklarda tarixinin ən böyük uğurunu əldə edib. 2014/15 mövsümündə HİK bu uğuru yenidən təkrarlaya bilərdi. Lakin pley-offda “Rapid”ə uduzaraq Avropa Liqasına yuvarlanıb. Komandanın azarkeşləri millətçilərdi. Əsasən Helsinkinin orta təbəqəsinin nümayəndələri HİK-ə dəstək olur. 1970-ci ildə HİK Helsinkinin mərkəzi qəsəbəsi olan Töölannda məskunlaşdı. Bundan sonra komandaya təkcə solçular yox, şəhərin digər sakinləri də azarkeşlik etməyə başladılar.

HİK “Kiffen”, HPS və HİFK ilə əzəli rəqibdi. Adını çəkdiyimiz komandaların hamısı Helsinkini təmsil edir. Amma əsas rəqabət HPS ilədi. Töölann ərazisinin sakinləri HİK-ə, Vallila və Alppila vətəndaşları isə HPS-ə azarkeşlik edir. Töölannlılar özlərini başqalarından üstün saydıqlarından klublar arasında belə rəqabət formalaşıb.

HİK azərbaycanlı azarkeşlərə də yad deyil. Helsinki klubu 2021/22 mövsümündə Avropa Liqasının 3-cü təsnifat mərhələsində “Neftçi” ilə qarşılaşıb.

Komandanın əsas güvəndiyi məqam oyunçuların fiziki durumunun yaxşı olmasıdı. Bütün futbolçular standart vəziyyətlərdə təhlükəlidi. Hamısı da başla oynamağı xoşlayırlar. “Qarabağ” bu məqamlarda ehtiyyatlı olmalıdı. “Neftçi” HİK ilə görüşlərdə ümumi nəticədə 2:5 hesabı ilə uduzub. Həmin komandaya nisbətdə HİK-in büdcəsi artıb, futbolçuları daha keyfiyyətlidi. Ümumiyyətlə, Finlandiya çempionatının səviyyəsi də yüksəldiyindən Helsinki təmsilçisi burda rahat hegemonluq edə bilmir.

Bir sözlə, “Qarabağ”ı çətin və gərgin oyunlar gözləyir. Ümid edirik ki, “köhlən atlar” bu rəqibi üstələyərək ən azı adını Konfrans Liqasının qrup mərhələsinə yazdıra biləcək.

İLKİN SULTANLI