Bildiyiniz kimi, “Qarabağ” “Linkoln”u keçərsə, ÇL-in növbəti təsnifat mərhələsində “Rakuv” – “Flora” cütünün qalibi ilə qarşılaşacaq.

“Football-plus.az” xəbər verir ki, Polşa çempionu ilk oyunda Estoniya təmsilçisi üzərində yeganə qolla qələbə qazanıb.

İlk yarıda “Rakuv” daha çox hücum etsə də, qonaqların əks-hücumları təhlükəli olub. Tarixində ilk dəfə Polşa çempionu olan “Rakuv”un heyətində fasilədən sonra Yeboa ilə Serosku da mübarizəyə qoşulub. 54-cü dəqiqədə məhz Yebonanın zərbəsindən sonra qapıçının qaytardığı topu Koçergin təkrar zərbə ilə tora göndərib. Bu komandalar arasındakı cavab görüşü iyulun 18-də keçiriləcək. “Qarabağ”ın “Linkoln” ilə bir gün sonra qarşılaşacağını nəzərə alsaq, ağdamlılar meydana çıxanda artıq növbəti rəqibin kimliyindən xəbərdar olacaq.

Maraq üçün “Rakuv”un dünən meydana çıxan heyətini də xatırladırıq:

Vladan Kovaçeviç, Stratos Svarnas, Zoran Arseniç, Milan Rundiç, Fren Tüdor, Ben Lederman (Qustav Berqqren, 82), Vladislav Koçergin, Martin Luk (Mayvey Vdovyak, 64), Bartoş Novak (Con Yeboa, 46), Jan Karlos Silva (Deyan Soresku, 46), Fabian Pyasetski (Lukaş Zvolinski, 78).