Növbəti mövsümdə birinci liqada çıxış edəcək komandalardan biri də “İrəvan” olacaq. Peşəkar liqada ilk dəfə debüt edəcək komandanın artıq baş məşqçisi də məlumdu. Rəhbərlik Elbrus Məmmədovu ictimaiyyətə təqdim edib.

Məmmədovun “Football-plus.az”a müsahibəsini təqdim edirik.

- Vaxtilə premyer-liqa təmsilçisində və U-21-də çalışmış biri kimi birinci liqa klubundan təklif alanda tərəddüd etmədiz?
- Rəhbərliklə görüşdüm, qarşıya qoyulan məqsəd və hədəf barədə danışdıqdan sonra təklifi dəyərləndirdim. Hiss etdim ki, adamlar ciddi iş görməyi planlaşdırırlar. Bu layihənin bir hissəsi olmaq istədim. Adından da göründüyü kimi, tarixi torpaqlarımızı təmsil edən klubdu.

- Qarşıya hansı məqsəd qoyulub?
- İlk növbədə peşəkar komanda formalaşdırıb sonra premyer-liqaya yüksəlmək uğrunda mübarizə aparacağıq.

- Elitada çıxış etmək o qədər də asan deyil. Qarşıya çox ciddi tələblər qoyulur. İlk dəfə birinci liqada çıxış edəcək klub bunun öhdəsindən gələ biləcək?
- Hazırda müəyyən boşluqlar var ki, onu aradan qaldırmağa çalışacağıq. Bəli, bu gün üçün “İrəvan” elitada çıxış etməyə bəlkə də hazır deyil. Ancaq rəhbərlik inkişaf naminə əlindən gələni edəcək. Əsas odu, sıfır nöqtəsindən tərpənək. Ondan sonra davamı gələcək.

- Köməkçiləriniz müəyyənləşib?
- Artıq ikisinin adı məlumdu. Aqil Məmmədovu “Sumqayıt”dan tanıyırsız. Qapıçılar üzrə məşqçi isə Vidadi Hüseynov olacaq. O vaxtilə “Keşlə” və “Xəzər Lənkəran”da çalışıb. Daha bir köməkçiyə ehtiyacım var. Fiziki hazırlıq üzrə məşqçi axtarışındayıq. Çox istərdim ki, o da yerli mütəxəssislərdən biri olsun. Burda tapmasaq, xaricdən dəvət edəcəm. Rəhbərlik uğurlu nəticə üçün hər cür dəstək verir.

- Komanda ev oyunlarını harda keçirəcək?
- Artıq bu məsələ həllini tapıb. Ev oyunlarımızı “ASK Arena”da keçirəcəyik. Məşqlərimiz də həmin arenada olacaq.

- Heyətlə bağlı vəziyyət necədi? Kimləri dəvət etmisiz?
- Artıq bəzi futbolçularla danışıqlar yekunlaşıb. Rəsmi müqavilə bağlanmadığından ad çəkmək istəmirəm. Yaxın günlərdə, daha dəqiq desəm, bayramdan sonra ortaq məxrəcə gəldiklərimizlə müqavilə bağlanacaq. Heyəti komplektləşdirmək yönündə çalışmalarımız davam edir. İndiki halda yalnız onu deyə bilərəm ki, “İrəvan”ın heyətində tanınmış, təcrübəli oyunçular yer alacaq.

RƏŞAD