Fanklublar yığmanı dəstəkləməyəcək - AÇIQLAMALAR
Millinin Avropa çempionatının seçmə mərhələsi çərçivəsində Estoniyaya qarşı keçirəcəyi oyuna sayılı günlər qalır. Mərdəkanda baş tutacaq görüşə nə qədər azarkeşin toplaşacağını indidən demək çətindi.
"Football-plus.az" xəbər verir ki, fikrini öyrəndiyimiz premyer-liqa təmsilçilərinin azarkeşləri qrup şəklində dəstək verməyəcəklərini söylədilər.
Elnur Quliyev (İmarət Tayfa):
"Biz çoxdan bəyanat yaymışdıq ki, nə qədər AFFA rəhbərliyi var, millinin oyunlarına getməyəcək və boykot edəcəyik. Yığmada heç bir nəticə, inkişaf yoxdu. Hətta onlar vaxtilə bizə pulsuz biletlər verəndə də mövqeyimizi dəyişməmişdik. Xüsusi halları və millinin hansısa həssas oyununu istisna etsək, heç vaxt yığmanın matçlarına getməyəcəyik. Bu yanaşma AFFA rəhbərliyi dəyişmədikcə belə olacaq. Amma fərdi şəkildə hansısa yoldaşlarımızın gedəcəyini də istisna etmirik".
Elgün Cəfərli (Qartallar):
"Azarkeşlərimiz iyunun 17-də ancaq fərdi şəkildə yığmanın Estoniya ilə matçına gedəcək".
Atif Rüstəmli ("Səbail"in azarkeşlərlə əlaqələndiricisi):
"Kollektiv şəkildə dəstək verilməyəcək. Azarkeşlərimiz fərdi şəkildə oyuna gedəcək".
Aqil Məmmədquliyev ("Neftçi"nin azarkeşlərlə əlaqələndiricisi):
"Öz klubumuzun oyunlarından başqa digər komandaların, o cümlədən yığmanın matçlarına təşkilatlanmış şəkildə getmirik. Amma fərdi şəkildə fanatlarımızın Azərbaycan - Estoniya görüşünə getməsi istisna deyil".
Nicat Cəfərzadə (Bakıdakı "Turan Tovuz" fanatlarının lideri):
"Yığmamızın Estoniya ilə oyununa qrup halında getmək planımız, müzakirəmiz olmayıb. Amma fərdi şəkildə kimlərinsə gedəcəyi gözlənilir".
Ağaxan Abdullayev ("Soldati Di Sabah"ın rəhbəri):
"Qrup halında yığmamızın oyununa getməyəcəyik. Amma fərdi şəkildə hər bir üzvümüz estonlarla oyunda millimizə dəstək verəcək".
Müşfiq Məmmədov ("Xəmsə"nin lideri):
"Fanklubun belə bir fikri yoxdu. Üzvlərimizdən kimlərsə getməkdə sərbəstdi “.
Nəriman Təbriz ("Red-Black Army"nin fəalı):
"Fərdi şəkildə izləməyə gedən azarkeşlərimiz ola bilər. Bununla bağlı məhdudiyyət yoxdu. Ancaq qrup şəklində milliyə dəstək olmağa getməyəcəyik".
ABDULLA İSMAYILOĞLU
Digər xəbərlər
