“Qarabağ”da yeni təyinata prezident qərar verəcək – AÇIQLAMA
"Qarabağ"ın mətbuat xidmətinin rəhbəri, tanınmış jurnalist Gündüz Abbaszadə klubu tərk edib.
Bu barədə məlumatı “köhlən atlar”ın rəsmi saytı yayıb. Klub da, Gündüz bəy də bildirir ki, ayrılıq qarşılıqlı razılıq əsasında olub. Bəs buna səbəb nədi? Məsələ ilə bağlı ətraflı məlumat əldə etmək üçün klubun baş meneceri Asif Əsgərova müraciət etdik. Onun fikirləri belə oldu: “Hansısa xüsusi səbəb yoxdu. Rəsmi saytımızda nə yazılıbsa, odu. Başqa heç nə yoxdu”.
“Qarabağ” ölkəmizi Çempionlar Liqasında təmsil edəcək. Bu səbəbdən də klubun mətbuat xidmətinin rəhbərinin olmaması problemdi. Transfer dövründə həm mediada, həm də sosial şəbəkələrdə çoxlu məlumatlar, şayiələr dolaşacaq. Bunları kim tənzimləyəcək? Yaxud da “Qarabağ”ın yeni mətbuat xidmətinin rəhbərinin adına nə zaman aydınlıq gələcək? Asif bəy sualımızı belə cavabladı: “Media xəbərsiz qoyulmayacaq. Bizim mətbuat departamentində Mehman Əşrəfovla Elvar Quliyev var. Onun “Xəzər Lənkəran” dönəmindən mətbuat xidmətində işləmək təcrübəsi var. Yeni təyinat hələ ki yoxdu. Prezidentimiz, klub rəhbərliyi kimi məsləhət bilsə, biz də onu açıqlayacağıq”.
İLKİN SULTANLI
