İTV rəsmisi: “Bütün oyunların yayın hüququnu əldə etmişik”
İyunun 21-dən iyulun 9-dək Gürcüstan və Rumıniyanın birlikdə təşkil etdiyi U-21 Avropa çempionatının final mərhələsinin oyunları keçiriləcək.
"Football-plus.az" xəbər verir ki, matçları ölkəmizdə yayınlamaq hüququna malik telekanal da məlum olub - İTV.
Görəsən, yerli azarkeşlər hansı görüşləri ekran qarşısında izləyə biləcək? Ümumiyyətlə, razılığın detalları nədən ibarətdi?
Bunları dəqiqləşdirmək məqsədilə İTV-nin İdman Departamentinin rəhbəri Kənan Hakimovla əlaqə saxladıq:
“Bütün oyunların yayın hüququnu əldə etmişik. Lakin elə matçlar var ki, üst-üstə düşür. Yəni 3 oyunun eyni vaxta başlayacağı günlər ola bilər. Təbii ki, hər üçünü eyni anda yayınlamaq mümkün deyil. Belə məsələlərdə tamaşaçı marağını nəzərə alacağıq. Hansı qarşılaşma uyğundusa, ona üstünlük veriləcək”.
Məlumat üçün qeyd edək ki, azərbaycanlı hakimlər də Avropa çempionatının final mərhələsində iş başında olacaq. FİFA referisi Əliyar Ağayevə Zeynal Zeynalovla Akif Əmirəli kömək edəcək. Onlar Gürcüstanda keçiriləcək A və C qrupunun matçlarında iş başında olacaqlar. A qrupunda Gürcüstan, Portuqaliya, Niderland və Belçika, B qrupunda Ukrayna, Rumıniya, İspaniya və Xorvatiya, C qrupunda isə İngiltərə, Almaniya, Çexiya və İsrail yığmaları mübarizə aparacaq. Son mövsümü “Sabah”da keçirən Aleksey Kaşuk Ukrayna millisinin heyətində yer alıb.
KƏNAN BAHADIR
Digər xəbərlər
