Çempionlar Liqasının (ÇL) son finalından 3 gün sonra turnirin yeni – 2023/24 mövsümünə start verilib.

"Football-plus.az" xəbər verir ki, iyunun 13-də ilkin mərhələnin püşkü atılıb.

Püşkatma mərasimi UEFA-nın İsveçrənin Nyon şəhərindəki mənzil-qərargahında keçirilib. Bununla da ilkin mərhələnin yarımfinal cütləri müəyyənləşib. Mini-turnirdən ibarət olacaq bu mərhələdə “Atletik Eskaldes” (Andorra) ilə “Buduçnost” (Monteneqro), “Tre Penne” (San Marino) ilə “Breydablik” (İslandiya) qarşılaşacaq. Yarımfinal oyunları iyunun 27-də, final isə iyunun 30-da olacaq.

İlkin mərhələnin bütün matçları İslandiyada keçiriləcək. Bu mərhələnin qalibi 1-ci təsnifat mərhələsinə vəsiqə qazanacaq və son çempionumuz “Qarabağ”ın potensial rəqiblərindən biri olacaq.

Əlavə edək ki, 1-ci təsnifat mərhələsinin püşkü iyunun 20-da atılacaq. Bu mərhələnin ilk oyunları iyulun 11-12-də, cavab görüşləri isə iyulun 18-19-da keçiriləcək.