Niyaməddin Paşayev: “Taekvondonun daha da inkişafı və yüksək nəticələr qazanmaq üçün nə lazımdısa, edirik”
Kişi taekvondoçulardan ibarət milli komandamızın məşqçilər heyətində dəyişiklik edilib. Baş məşqçi Rza Mehmandost və böyük məşqçi Elnur Amanov vəzifəsindən kənarlaşdırılıb.
Məsələ ilə bağlı daha detallı informasiya almaq və dəyişikliyin səbəbini öyrənmək məqsədilə Taekvondo Federasiyanın vitse-prezidenti Niyaməddin Paşayevlə danışdıq:
“Yığma Polşanın Krakov şəhərində keçiriləcək 3-cü Avropa Oyunlarına yeni məşqçi heyətinin rəhbərliyi altında yollanacaq. Komanda müvəqqəti olaraq gənclər və yeniyetmələrdən ibarət millilərin çalışdırıcılarına həvalə olunub. Yeni təyinatlara qədər Məmməd Abdullayev Rza Mehmandostun, Rəşad Məmmədov isə Elmur Amanovun funskiyalarını icra edəcək. Onların qarşısına yüksək nailiyyətlər qazanmaq hədəfi qoyulub. Avropa Oyunlarından sonra yeni baş məşqçi və böyük məşqçinin adına aydınlıq gətirəcəyik. Dəyişikliyin səbəblərinə gəlincə, belə lazım oldu. Taekvondonun daha da inkişafı və yüksək nəticələr qazanmaq üçün nə lazımdısa, edirik. 3-cü Avropa Oyunlarında komandaya ümumi rəhbərliyi özüm edəcəm".
Başverənlərlə bağlı sabiq baş məşqçi Rza Mehmandostla əlaqə saxlamaq cəhdlərimiz baş tutmadı. Böyük məşqçi Elnur Amanov isə xəbəri ilk dəfə bizdən eşitdiyini dedi:
"Dəqiq məlumatdısa, nə deyə bilərəm? Hər an hər şey baş verə bilər. Bu haqda hələ ki çox danışmaq istəmirəm. Yəqin federasiya rəhbərliyi səbəbləri bilir. Özlərindən soruşun, məni niyə işdən azad etdiklərini desinlər. Vallah, mən heç nə bilmirəm".
Niyaməddin Paşayevlə Elnur Amanov etiraf etmək istəməsə də, görünür, dəyişikliyə yığmamızın mayın 29-dan iyunun 4-dək Bakıda keçirilən dünya çempionatındakı fiaskosu səbəb olub. Bilindiyi kimi, milli komandanın mundialı medalsız başa vurması ictimaiyyət arasında böyük narazılıq doğurub. Digər tərəfdən, Elnur Amanov ötən saylarımızdan birinə müsahibə verərkən yığma üzvlərinin Olimpiadada iştirakının sual altında olduğunu demişdi. Yəqin ki, federasiya rəhbərliyi bu addımla milliyə yeni nəfəs gətirməyi düşünüb.
Qeyd edək ki, ölkəmizi 3-cü Avropa Oyunlarında 8 taekvondoçu təmsil edəcək. Yarışda Səyyad Dadaşov (54 kq), Qaşım Maqomedov (58 kq), Cavad Ağayev (68 kq), Eltac Qafarov (74 kq), Taleh Süleymanov (87 kq), Minayə Əkbərova (46 kq), Patimat Abakarova (49 kq) və Fəridə Əzizova (67 kq) qüvvəsini sınayacaq. Qadınlardan ibarət yığma dayanq üzərinə baş məşqçi Sun Mi Park və böyük məşqçi Hyeyounq Çoinin rəhbərliyi altında çıxacaq. Hakim kimi isə ölkəmizi beynəlxalq dərəcəli referi Aygül Abdullayeva təmsil edəcək. Avropa Oyunlarında taekvondo yarışları iyunun 23-26-sı aralığında baş tutacaq.
KƏNAN BAHADIR
Digər xəbərlər
