Kazbek Tuayev nazirdən Prezidentə şikayət etdi, AGİN onu prokurorluqla hədələyib
Veteran futbolçu, AFFA İcraiyyə Komitəsinin üzvü, İxtisaslaşdırılmış Olimpiya Ehtiyatlari Uşaq Gənclər Futbol Məktəbinin direktoru Kazbek Tuayevin tutduğu postdan ayrılacağı təxminən iki ay öncədən məlum idi.
"Football-plus.az" xəbər verir ki, bununla bağlı mətbuatda xəbərlər dolaşırdı. Ancaq nədənsə futbolumuzun “ağır artilleriyası” həmin vaxt yayılan xəbərlərə heç bir reaksiya vermədiyi halda, iki gün öncə əl-ayağa düşüb, gənclər və idman naziri Fərid Qayıbovdan ölkə başçısına şikayət edib. O, iddia edib ki, ötən ay Gənclər və İdman Nazirliyi tərəfindən vəzifəsindən getməklə bağlı ərizə yazmağa məcbur edilib. Bu tələbi yerinə yetirməkdən imtina etdiyini deyən 82 yaşlı futbol veteranı iyunun 5-də Fərid Qayıbovun əmri ilə vəzifəsindən azad olunduğunu söyləyib. O, yaşının çoxluğu ilə bağlı verilən bu qərarı qanunsuz adlandırıb və buna hüquqi qiymət verilməsini xahiş edib.
Veteran futbolçu bildirib ki, Gənclər və İdman Nazirliyinin əməkdaşları onu prokurorluq yoxlaması ilə hədələyib:
“Məktəbin bütün məşqçi-müəllimlərinə maaş verilməsi gecikdirilib ki, bu da özlüyündə artıq kobud qanun pozuntusudu. Bütün bunlar nizam-intizamın həmişə hökm sürdüyü kollektivdə sosial gərginliyə səbəb olur. Bu il iyunun 5-də nazir Fərid Qayıbovun vəzifədən azad edilməyimlə bağlı əmri mənə bildirildi. Yaşıma görə əsaslandırılan bu qanunsuz qərara hüquqi qiymət verməyinizi, şərəf və ləyaqətimi qorumağınızı, nəinki məktəbin direktoru vəzifəsinə bərpa olunmağımı, həm də Qayıbovun davam edən kadr siyasətinə ciddi diqqət yetirməyinizi xahiş edirəm”.
82 yaşlı ağsaqqalın kreslosundan belə bərk-bərk yapışması çox gülməlidi. Tuayev bu günə kimi ölkə rəhbərliyindən yetərincə diqqət görüb, imtiyazlar əldə edib, yüksək təqaüdlə təmin olunub. Bu yaşda məktəb direktoru olmaq belə vacibdi? Bir də bu məsələdə diqqəti çəkən məqam nazirliyin Kazbek bəyi prokurorluqla hədələməsidi. Görəsən, Tuayev uzun illər rəhbərlik etdiyi İxtisaslaşdırılmış Olimpiya Ehtiyatlari Uşaq Gənclər Futbol Məktəbində nə edib ki, özü qeyd etdiyi kimi, Fərid Qayıbovun əməkdaşları ona hədə-qorxu gəlib? Yəqin nazirliyin bu addımının arxasında ictimaiyyətə məlum olmayan səbəblər var.
Məsələ ilə bağlı Gənclər və İdman Nazirliyinin mövqeyini örənmək istəsək də, qurumun mətbuat katibi Qabil Mehdiyev müraciətimizi cavabsız qoydu.
RƏŞAD
Digər xəbərlər
