Azərbaycan çempionatının qalmaqallarla zəngin günləri keçmişdə qalıb.

İndi Allaha şükür, futbolumuzda güllük-gülüstanlıqdı. Necə deyərlər, qurd quzu ilə otlayır, heç kim başqasının xətrinə dəymir. Hardadı o “böyük oyun”un ətrafında yaşanan ajiotajlar? Bakıda “Xəzər Lənkəran”a hücum edilərdi, Lənkəranda “Neftçi”nin avtobusunu daşa basardılar. Mən hələ “Bakı” – “Xəzər Lənkəran” oyunundan sonra Respublika stadionunda baş verən davanı demirəm. Cənub klubunun qapıçısı Kamran Ağayev həmin gün heç polislərdən də çəkinmirdi, Tuyqun Nadirovun “xətrinə dəyən” asayiş keşikçisini şəxsən tapıb cəzalandırmaq fikrinə düşmüşdü. Kubokun finalından sonra meydanın ortasında qan tökülməsini də unutmamışıq. “Bakı”nın futbolçularından birinin “Neftçi” ilə oyundan sonra döyülməsi isə iki klub arasında müharibəyə səbəb olmuşdu, klub rəsmilərinin arasında gecə saatlarına qədər davam edən “razborka” sonda sülhlə yekunlaşmış, tərəflər yenidən qan tökülməsinin qarşısını almışdılar.

Hər nə qədər xoşagəlməz olsa da, belə qalmaqallar da futbolun ayrılmaz hissəsidi. Çünki futbol emosiyaları sevən rəqabət oyunudu. Həmin o rəqabət də futbolun inkişafına təsir edir, mübarizə daha maraqlı olur. Siz də razılaşarsız ki, Azərbaycanda futbol az-çox elə həmin vaxtlar inkişaf edirdi, ölkə çempionatı da maraqlı keçirdi. İndi o günlərin xiffətini çəkirik, həmin vaxtlar üçün darıxırıq. Məsələ təkcə dava-dalaşda deyil. O qalmaqallar yaşananda çempionatın oyunları dolu tribunalar qarşısında keçirilirdi, klublar bir-biriylə yarışa çıxıb daim yaxşı yerli, yaxud da əcnəbi futbolçuların axtarışında olurdu. Ötən günlərin nostalgiyasına çox da qapılmayıb, ümidimi ifadə edim ki, nə vaxtsa o günlərə yenidən qayıdarıq. Dava-dalaş olmasa da, həmin rəqabət yenidən yaşanar, futbolumuz və çempionatımız yenidən inkişaf etməyə başlayar.

Sükutu bugünlərdə “Səbail”in portəgizli hücumçusu Qoba Zakpa pozdu. Bayıl komandasının legioneri “Turan Tovuz”la oyunda qol vurandan sonra əlini həssas yerinə tərəf aparıb, biədəb jest edib. Həmin epizodun kadrlarını görəndə xeyli təəssüflənmişdim. “Səbail”in heyətində 9 legioner var. Onlardan biri də Zakpadı. Bu 9 legionerin gücü, səviyyəsi ötən 35 tur ərzində yetərli olmayıb ki, “dənizçilər” elitadakı yerini təmin etsin. Son tur ərəfəsində “Səbail” “Şamaxı”yla ölüm-qalım mübarizəsi aparır, özü də iş elə gətirib ki, həlledici qarşılaşmada bu iki komanda bir-biri ilə qarşılaşacaq. “Şamaxı”nın isə heyətində legioner yoxdu. Yəni bölgə təmsilçisi bütünlüklə yerli futbolçulardan qurulmuş heyətlə mübarizə aparır. Bununla belə, “Şamaxı” ilə “Səbail”in oyun səviyyəsi, nəticələri, topladığı xallar arasında ciddi fərq yoxdu. Buna görə Zakpa da, onun kimi digər legionerlər də, həmçinin onları Azərbaycana gətirənlər və “Səbail”ə götürənlər də utanmalıdı. Zakpa isə utanmaq əvəzinə Tovuzda özünün biədəb yerini göstərir, meydanın ortasında tərbiyəsizlik edir.

Elə Zakpanın hərəkəti qədər “Səbail”in bu məsələni ört-basdır etməyə çalışması da biabırçılıq idi. Klubdan verilən açıqlamada deyilirdi ki, futbolçu hansısa jest etmək fikrində olmayıb, uğursuz oturan alt paltarını düzəldib. Onu da əlavə etmişdilər ki, yanlış anlaşılma yaşanmasın deyə futbolçuya ehtiyatlı olmağın lazımlığı bildirilib, Zakpa da öz növbəsində bundan sonra daha ehtiyatlı olacağını söyləyib. Adam bilmir gülsün, ya ağlasın. Əlbəttə, klubun futbolçusuna sahib çıxması, onu müdafiə etməyə çalışması anlaşılandı. Amma bu boyda rəzalətin qarşısında “uğursuz alt paltarı düzəltmə əməliyyatı” uydurmağa ehtiyac yox idi. Üzrxahlıq etmək, Zakpanın emosiyalarına qurban getdiyini demək daha yaxşı çıxış yolu idi. Belə olan halda “Səbail” rəsmiləri də özlərini gülünc vəziyyətə salmazdılar.

AFFA İntizam Komitəsi portəgizli hücumçunu 3 oyunluq diskvalifikasiya edib. Eyni zamanda onun bu hərəkəti Bayıl təmsilçisinin 1600 manat cərimələnməsinə də səbəb olub. Adama deyərlər, indi nə oldu? Təkcə “Səbail”in yox, digər klubların legionerlərinin də bu hadisədən dərs çıxarması lazımdı. Gedib alt paltarlarını başqa yerdə düzəltsinlər!

AMAL