Futzal üzrə yüksək liqada cari mövsüm başa çatdı. “Araz-Naxçıvan”ın çempion, “Neftçi” İK-in ikinci, “Baku Fire”nin üçüncü olduğu “futzal ili” maraqlı görüşlərlə yadda qaldı.

Futzal Federasiyasının İcraiyyə Komitəsinin üzvü, “Araz-Naxçıvan”ın vitse-prezidenti Mahmud Sadıqovla söhbətdə həm cari, həm də növbəti mövsümə işıq salmaqla yanaşı, Çempionlar Liqasını da unutmadıq.

- Geridə qalan futzal mövsümünü necə dəyərləndirirsiz? “Araz-Naxçıvan” sanki asanlıqla Çempionlar Liqasına vəsiqə qazandı...
- Ötən mövsüm ən zəif çempionatlardan birinə şahidlik etdik. “Alyans” və “Record club” kimi komandaların iranlı üzvlərinin ölkəni tərk etməsi klubların zəifləməsinə, “Neftçi” İK, “Araz-Naxçıvan” və “Baku Fire” kimi güclü rəqiblərin böyükhesablı qələbələrinə səbəb oldu. Açığı, həmin nəticələrə sevinə bilmədik. İstərdik ki, rəqiblər daha güclü olsun. Çünki beynəlxalq qarşılaşmalarda istəmədən öyrəşdiyimiz fiziki hazırlıq səviyyəsi mənfi təsir göstərə bilər...

- Yüksək liqada mübarizə başa çatdı. Yeni mövsümün və Çempionlar Liqasında çıxışın planları cızılıb?
- Əlbəttə. Növbəti mövsümdə görüləcək işlər çoxdu. Hədəflər getdikcə böyüyür. İcraiyyə Komitəsinin üzvü kimi iclaslarda təkliflərlə çıxış edirəm. Yeni ideyalar var. Müəyyən addımlar atılacaq. AFFA İcraiyyə Komitəsinə də bu haqda məlumat verəcəyik. Çempionlar Liqasına gəlincə, səbirsizliklə iyulun 6-nı gözləyirik. Püşkatmadan sonra Çempionlar Liqasına ilkin, yoxsa əsas mərhələdən başlayacağımız bəlli olacaq. İyulun 15-dən sonra təlim-məşq toplanışlarına başlamağı planlaşdırırıq. Oyunçulara istirahət vermişik. Rəhbərliyin isə dincəlməyə vaxtı yoxdu.

- Heyətdə dəyişikliklər nəzərdə tutulur, yoxsa son çempionlara güvənəcəksiz?
- Andreu Varqas və Viktor Ponce ilə müqavilənin müddətini uzatmadıq. İkisinin də zədəsi çox ciddi idi. Müalicə üçün lazım olan yardımları etdik. Ümid edirəm ki, tezliklə sağlamlıqlarını tam bərpa edəcəklər. Hədəflər böyüdüyü üçün səhhətində problem olmayan futzalçılara ehtiyacımız var. Bu istiqamətdə işlər davam edir. 2 ay ərzində əsas heyəti komplektləşdirəcəyik. İsa Atayev, Fərid Ələkbərov, Novruz Kazıxanov, Cavad Məmmədov, Emil Kürdov, əcnəbilərdən isə Amadeu, Felipinyo, Katataun, Felipe kimi futzalçılarla müqavilənin müddətini uzatdıq. Yeni əcnəbi oyunçular da cəlb etmək istəyirik. Yerli futzalçılar da hədəfdədi.

- Yerli futzalçı demişkən, Qazaxıstan “Atırau”sunda legioner həyatı yaşayan Rövşən Hüseynlini “Araz-Naxçıvan”da görə bilərik?
- Kim istəməz ki? Mayın 15-də - final matçında qələbə qazandıqdan dərhal sonra Rövşənlə əlaqə saxlayıb onu heyətdə görmək istədiyimi dedim. “Atırau” onunla müqaviləni yeniləmək niyyətindədi. Üstəlik başqa klublardan da təkliflər aldığını bildirdi. Şərtlərimi dinlədikdən sonra 10 gün vaxt istədi. Ailəsi ilə məsləhətləşib cavab verəcək. Ötən mövsüm məşqçilər korpusunun səhv qərarları səbəbindən Çempionlar Liqasında qapıda problem yaşadıq. Bu dəfə arxayın olmaq istəyirəm. Dediyim kimi, hədəflərə çatmaq üçün daha təcrübəli futzalçılara ehtiyac var ki, Rövşən bu sahədə liderdi.

- “Futbol+”ə Xətai Bağırovla Xəzər Ağalızadənin müqaviləsinə xitam verilə biləcəyini demişdiz. Planlaşdırılan heyətdə adları çəkilmədi...
- Hər ikisi ilə ciddi müzakirələr apardıq. Müqaviləyə xitam vermək mövzusunda qərarlı idim. Üzrxahlıq edib səhvlərini başa düşdüklərini, bir daha xoşagəlməz halların yaşanmayacağını dedilər. Xəzər bacarıqlı futzalçıdı. Xətainin də “Araz-Naxçıvan”ın bu günlərə gəlməsində danılmaz əməyi var. Mayın 31-də müqavilələrinin müddəti bitir. Çox güman ki, onlara son dəfə şans verəcəyik. Sonda “Futbol+” kollektivinə futzala diqqət ayırdığına, uğurlarla yanaşı, çatışmazlıqları da ətraflı və şəffaf şəkildə işıqlandığına görə təşəkkür edirəm. Bununla yanaşı, federasiyanın prezidenti Zaur Axundova da “çox sağ ol” deyirəm ki, həmişə bu sahənin inkişafı üçün əlindən gələni, bəzən isə gəlməyəni belə etməyə çalışıb.

KƏNAN BAHADIR