Mayın 11-də Konfrans Liqasının (KL) finaldan əvvəlki mərhələsi start götürdü.

Hər iki yarımfinal matçında tərəflərdən birinin 2:1 hesablı qələbəsi qeydə alındı. “Vest Hem” ilə “Bazel” ayın 18-nə təyin olunan cavab görüşləri ərəfəsində kiçik üstünlük qazandı.

yarımfinal, ilk oyunlar
Vest Hem - Alkmaar 2:1
Benrahma, 67-p. Antonio, 76 - Reynders, 42.

Vest Hem (İngiltərə): Areola, Zuma, Kerer, Agerd, Kressuell, Souçek, Rays, Paketa, Benrahma (Fornals, 90), Bouen, Antonio (İnqz, 80).

Alkmaar (Niderland): Rayan, Suqavara, Hatsidiakos, Bekema, De Vit, Klasi, Reynders, Meynans, Van Brederode (Mihayloviç, 80), Pavlidis, Odqor (Lahdo, 68).

Avropanın ikinci mövsümü təşkil edilən “üçüncü dərəcəli” klub turnirinin favoritlərindən sayılan “Vest Hem” üçün “Alkmaar”a qarşı ev oyunu heç də asan keçmədi. Başı hazırda premyer-liqadakı yerini qorumağa qarışan Devid Moyesin komandası ilk hissədə rəqbin ciddi müqaviməti ilə üzləşdi.

Niderlandlılar hətta fasilə ərəfəsində hesabı açmağa da nail oldular. Lakin 2-ci hissədə vəziyyət dəyişdi. Meydan sahibləri hücumda fəallığı artırmaqla istəyinə çatdı: Benrahma ilə Antonionun qolları londonluların əzmkar qələbəsini təmin etdi.

Fiorentina - Bazel 1:2
Kabral, 25 – Diuf, 71. Amduni, 90+1.

Fiorentina (İtaliya): Terraçano, Dodo, Martines, Ranyeri, Biraqi, Bonaventura (Barak, 87), Amrabat (Kastrovilli, 73), Mandraqora, İkone (Kuame, 81), N.Qonsales (Brekalo, 73), Kabral (Yoviç, 82).

Bazel (İsveçrə): Hits, Lanq, Adams Nuhu, Pelmar, Kalafyori (Millar, 63), Caka, Burger (Males, 86), Diuf, Ndoye, Oqustyen (Zekiri, 77), Amduni.

Florensiyadakı matçın ssenarisi Londondakı dueli xatırlatdı. Oyuna fəal başlayan “Fiorentina” ilk hissənin ortalarında Kabral ilə hesabı açdı. Braziliyalı hücumçu bu mövsüm KL-də 7-ci qolunu vurmaqla bombardirlərin yarışında vahid liderliyə nail oldu.

Ev sahibləri hissənin sonuna qədər fəal təsir bağışladılar. Lakin Vinçentso İtalyanonun komandası statistik üstünlüyünü hesabda əks etdirə bilmədi. Nəticə isə fərqli oldu.

1/4 finalda gözlənilmədən “Nitsa”nı mübarizədən kənarlaşdıran “Bazel” tədricən üstünlüyü ələ aldı. Son 23 dəqiqədə qapısından iki top buraxan “Fio” 1:2 hesabıyla uduzaraq finala vəsiqə qazanmaq şansını çətinə saldı.

Bombardirlər: Kabral (Fiorentina) - 7, Amduni (Bazel), Antonio (Vest Hem), Yoviç (Fiorentina), Kuypers (Gent) - 6.