Dünən Azərbaycan hakimliyi adına rəzalət yaşandı.

Premyer-liqanın 32-ci turunun “Zirə” – “Turan Tovuz” matçını FİFA referisi Rauf Cabbarov idarə edirdi. Oyunun gərgin keçəcəyi bəlli idi. Çünki bakılılar Konfrans Liqasına vəsiqə, tovuzlular isə çempionatda qalmaq uğrunda mübarizəni davam etdirir. Böyük ehtimalla Hakimlər Komitəsi bu görüşə Rauf Cabbarovu təcrübəsinə görə təyin etmişdi. Lakin referi hər şeyi daha da bərbad etdi. Bu yazıda atası da vaxtilə hakim olan Raufun son qarşılaşmadakı 5 biabırçı səhvini diqqətinizə çatdıracağıq...

Jurnalistlərin gördüyünü görmədi
Matçın 19-cu dəqiqəsində Roderik Millerin müdaxiləsindən sonra Vladislav Kulaç “Turan Tovuz”un cərimə meydançasında yerdə qaldı. FİFA referisi fitini səsləndirdi və 11 metrlik cərimə zərbəsi təyin etdi. Hamidu Keyta “nöqtə”yə yaxınlaşırdı ki, VAR-dan siqnal gəldi. Cabbarov epizodu izlədikdən sonra qərarını ləğv etdi. Amma hadisə düz hakimin gözü qarşısında baş vermişdi. O, əminliklə “nöqtə”ni göstərmişdi. Hətta media sektorunda əyləşən jurnalistlər belə epizodun penalti olmadığını ilk andan dəyərləndirə bildi. FİFA referisi isə bunu bacarmadı.

Bu dəfə dəqiq penalti idi
7 dəqiqə sonra hakim yenidən 11 metrlik cərimə zərbəsi təyin etdi. Piruzi ilə Şəhriyarın arasında qalan Eldar Quliyev “Turan Tovuz”un cərimə meydançasında yerdə qaldı. Referi yenə əminliklə “nöqtə”ni göstərdi. Keyta zərbəni vurmaq istəyərkən Tural Qurbanov yenə Rauf Cabbarovu VAR-a baxmağa dəvət etdi. 4 dəqiqədən sonra referi dəqiq qərar verə bildi ki, penaltidi. Əslində onun ilk qərarı doğru idi. Lakin FİFA referisinin özünə inanmaması işin bu həddə çatmasına səbəb oldu.

“Zirə”nin haqqı yeyildi
39-cu dəqiqədə isə hakim biabırçılığı pik həddə çatdı. “Zirə”nin təmiz qolu sayılmadı. Keytanın ara ötürməsindən sonra Kulaç topu qapıdan keçirdi. Lakin yan xətt hakimi bayrağını qaldıraraq ofsayd qərarı verdi. Sonra Tural Qurbanov Rauf Cabbarovu VAR-a baxmağa dəvət etdi. Epizodu izləyən FİFA referisi qərarından dönmədi. Lakin “CBC Sport”un yayınında təkrarda göstərildi ki, qol qaydalar çərçivəsində vurulub. Referi isə fərqli qərar verdi. Burda Rauf Cabbarova göstərilən xətt də əyri çəkilmişdi. Bir sözlə, idarəçiliyi tam itirən Cabbarov “Zirə”nin haqqını yedi.

“Turan Tovuz”un lehinə penalti verilmədi
İlk hissəyə əlavə olunan 3-cü dəqiqədə Runi Eva “Zirə”nin cərimə meydançasında yerdə qaldı. Cibrila İssa ona qarşı qaydanı pozmuşdu. Lakin referi oyunu davam etdirdi. Epizodun təkrarında Runinin ayağına təmas olduğu aşkar göründü. Hətta oyunun şərhiçisi Pərviz Musayev də dilə gələrək penalti olduğunu dedi. Lakin FİFA referisi epizodu izləsə də, 11 metrlik cərimə zərbəsi təyin etmədi.

Qərarsız qalan hakim
Matçın 53-cü dəqiqəsində daha bir biabırçılıq yaşandı. “Turan Tovuz” cərimə zərbəsini yerinə yetirirdi. Denis Marandiçi hakimin fitini gözləmədən qapı önünə asma etdi. Roderik Miller isə topu başla tora qovuşdurdu. Hakim əvvəlcə qolu qeydə aldı. Daha sonra isə VAR-da oturanlarla məsləhətləşərək qərarını ləğv etdi.

Bir sözlə, 90 dəqiqə ərzində gözlə görünəcək qədər səhvə yol verən Rauf Cabbarov maraqlı keçən oyunu pis günə qoydu. Yəqin ki, Hakimlər Komitəsinin rəhbəri Barış Şimşək də bu səhvləri görüb. Onun lazımi addımı atacağına ümid edək...

İLKİN SULTANLI