“Uşaq və gənclərin fiziki və mənəvi inkişafı” istiqaməti üzrə layihə çərçivəsində yazılarımız davam edir.

Aprelin 7-dən 9-dək Türkiyənin İzmir şəhərində keçirilən “İzmir Cup” beynəlxalq turnirində Azərbaycan futbolunu təmsil edənlərdən biri də “Neftçi”nin 12 yaşadək futbolçulardan ibarət komandası idi. Baş məşqçi Vaqif Əliyevin yetirmələri H qrupundakı ilk oyununda İtaliyanın “Yuventus” klubu ilə qolsuz heç-heçə etdi. “Ağ-qaralar” növbəti görüşdə Türkiyənin “Girəsunspor” komandasını 1:0 hesabıyla məğlub edib, “Şalke”yə minimal hesabla uduzub. İkinci oyun günündə məşhur “Beşiktaş”ı 1:0 hesabıyla məğlub edən “Neftçi”nin U-12 komandası “Urla”nı 3:0, Belçikanın “Vesterlo” klubundan olan həmyaşıdlarını isə 1:0 hesabıyla üstələməyi bacardı. Bu qələbələrdən sonra “Neftçi” “Zenit”ə 0:6, Fransa təmsilçisi “Mets”ə isə 0:1) uduzub. Keçirdiyi səkkiz oyundan 13 xal toplayan “Neftçi” qrupda 4-cü yeri tutmaqla növbəti mərhələyə adlayıb. Amma “ağ-qaralar” 1/16 finalda Belçika “Brügge”sinə 0:2 hesabıyla məğlub olaraq mübarizəni dayandırıb.
Biz də komandanın baş məşqçisi Vaqif Əliyevlə söhbətdə həm “İzmir Cup”da “Neftçi”nin çıxışına toxunduq, həm də “Neftçi”nin futbol akademiyasında görülən işlərdən danışdıq.

- Vaqif bəy, əvvəlcə özünüz haqqında məlumat verərsiz. Futbola gəlişiniz necə oldu? İlk məçqçinizi və komandanı necə xatırlayırsız? Məşqçi olmağa necə qərar verdiz? Ümumiyyətlə, futbolçuluqdan məşqçiliyə keçid necə alındı?
- Mən 1985-ci ildə dünyaya göz açmışam. Futbolla məşğul olmağa 6 yaşımdan başlamışam. İlk məşqçim Yaşar Babayev olub. Təəssüf ki, cəmi 17 yaşımda karyeramı bitirməli oldum. Buna da aldığımız zədə səbəb oldu. Dizimdən aldığım zədə futbolçu karyeramı davam etdirməyə imkan vermədi. Çox sevdiyim futboldan uzaq qala bilməzdim, ona görə də məşqçi olmağa qərar verdim. Əminliklə deyə bilərəm ki, futbolçu kimi qazana bilmədiklərimi məşqçi kimi etməyi bacardım, çünki bu işə sevərək başlamışdım. 2013-cü ildə “Neftçi”nin U-13 komandasında köməkçi-məşqçi kimi işə başladım. Növbəti il 2004-cü il təvəllüdlü uşaqların oynadığı U-11 komandasının baş məşqçisi təyin edildim. Elə həmin il də komandam Azərbaycan çempionu adını qazandı. 2015/16-cı il mövsümündə U-12 komandamız çempion oldu. 2015-ci ildə “Sabahın Ulduzları” turniri Avropa Oyunlarına həsr olunmuşdu. Həm o turnirin, həm də klubların akademiyaları arasında keçirilən turnirin qalibi olmağı da bacardıq. Növbəti mövsüm 2005-ci il təvəllüdlü uşaqları qəbul etdim, U-12 komandalarının çempionatında yarımfinalda məğlub olduq. 2017/18 mövsümündə usə U-13 komandamız Azərbaycan çempionatının ikincisi oldu. Növbəti il yenidən 2006-cı il təvəllüdlü uşaqları qəbul etdim. U-13 komandasıyla finalda məğlub olub, gümüş medallar qazandıq. 2005-ci il təvəllüdlü uşaqlardan qurulmuş U-15 komandasının baş məşqçisi kimi 2019/20-ci il mövsümü pandemiya səbəbindən yarımçıq qaldı, həmin vaxt turnir cədvəlində 2-ci pillədə idik. Cari mövsümdə “Neftçi”nin U-12 komandasını çalışdırıram, 2011-ci il təvəllüdlü uşaqlara futbolun sirlərini öyrədirəm. Hazırda da çempionat davam edir.

- Bu yaxınlarda “Neftçi”nin U-12 komandasıyla İzmirdə iştirak etdiyiniz turnir barədə danışaq. Turnir necə təşkil olunmuşdu? Hansı rəqiblərlə qarşılaşdız, nəticələr necə oldu?
- Doğru vurğuladız, tunir Türkiyənin İzmir şəhərində yüksək səviyyədə təşkil olunmuşdu. Bir növ U-12 komandalarının Çempionlar Liqası idi. Avropanın bir çox güclü klublarının uşaq komandaları bu turnirdə mübarizə aparırdı. Ümumilikdə 72 komanda turnirə qatılmışdı, biz də son 32 komandanın sırasına qala bildik. Bizim qrupda “Yuventus”, “Şalke”, “Mets”, “Vesterlo”, “Zenit”, “Beşiktaş” kimi rəqiblər yer alırdı. Onlarla başabaş mübarizə apardıq və 13 xalla qrupda 4-cü yeri tutduq. Bu da bizə qrupdan çıxmağa, 1/16 finalda mübarizə aparmağa imkan verdi. Bu mərhələdə Belçikanın məşhur “Brügge” komandasıyla qarşılaşdıq və 0:2 hesabıyla məğlub olaraq mübarizəni dayandırdıq. Qeyd edim ki, “Brügge” finala qədər yoluna davam etdi və yalnız finalda Münhen “Bavariya”sına uduzdu.



- Necə düşünürsüz, belə beynəlxalq səviyyəli turnirlər uşaqlar üçün hansı məqamlarla yadda qalır, onların inkişafına necə təsir göstərir?
- Bu cür beynəlxalq oyunlar həm uşaqlar, həm də bizim üçün böyük təcrübə rolunu oynayır. Çünki beynəlxalq səviyyəli oyunlar tam başqadı, yerli çempionatlardan çox fərqlənir. Həmin turnirlərdə keçirilən oyunlar daha sürətli olur, uşaqlar həm sürətli, həm də təzyiq altında oynamağı öyrənirlər. Tez düşünüb, qərar verməyə çalışırlar. Bu cür beynəlxalq turnirlər bizim üçün əvəzsiz təcrübədi. Sürət və çevikliyin artması, daha səviyyəli, adlı-sanlı rəqiblərlə qarşılaşmalar uşaqların inkişafına böyük təkan olur. Bu cür turnirlərin sayı nə qədər çox olarsa, yeniyetmə futbolçularımız da böyük təcrübə qazanar, gələcəkdə daha səviyyəli yarışlara, ciddi sınaqlara hazırlıqlı olarlar.



- Hazırda çalışdığınız “Neftçi”nin uşaq akademiyasında işlər necə qurulub? Ümumiyyətlə, günümüzdə futbolla maraqlanan uşaqların səviyyəsi necədi? Onların istedadı, futbola həvəsi sizi qane edirmi?
- Akademiyamızda işlər düzgün qurulub, zaman keçdikcə daha da yaxşılaşdırmağa, inkişaf etdirməyə çalışırıq. Türkiyəli mütəxəssis Cemal Bülbül və çox hörmətli Elşad Əhmədov akademiyamıza rəhbərlik edir, məşqlərdə və iclaslarda öz təcrübələrini bizimlə bölüşürlər. Onlar da çalışırlar ki, uşaqların inkişafını sürətləndirib, ümumi işə öz töhfələrini yüksək səviyyədə versinlər. Biz gənc məşqçilər də daim öz üzərimizdə çalışırıq ki, işimizi daha da keyfiyyətli edək. Daim fikirlərimizi və təcrübəmizi bölüşürük. Hazırda komandalarımızda futbolla məşğul olan uşaqların həm səviyyəsi, həm də futbola yanaşması bizi qane edir. Aralarında istedadlı olanlar da yetərincədi. Çalışırıq ki, bundan sonra daha da yaxşılaşsın.

İLKİN SULTANLI



Yazı Azərbaycan Respublikasının Medianın İnkişafı Agentliyinin maliyyə dəstəyi ilə, “Uşaq və gənclərin fiziki və mənəvi inkişafı” istiqaməti üzrə hazırlanıb.