Azərbaycanın iki qadın güləşçisi Xorvatiyanın paytaxtı Zaqrebdə keçirilən Avropa çempionatında yarımfinala yüksəlib.

"Football-plus.az" xəbər verir ki, Türkan Nəsirova (53 kq) və Jalə Əliyeva (57 kq) qitə birinciliyində qızıl medal şansını davam etdiriblər.

Nəsirova ilk iki mərhələdə müvafiq olaraq Mariya Spirkovska (Şimali Makedoniya) və Marina Floresi (İspaniya) məğlub edib. Gənclər arasında Avropa çempionu olan 26 yaşlı güləşçi final yolunda isveçli Emma Malmqrenlə qarşılaşacaq.

Yarışa 1/4 finaldan başlayan Jalə Əliyeva bu raundda almaniyalı Yelena Brüggerdən güclü olub. O, yarımfinalda Yovita Vrzeşienlə (Polşa) gücünü sınayacaq.

Nigar Mirzəzadə (72 kq) təsnifatda Lyudmila Tiçinaya (Ukrayna), Elis Manolova (65 kq) isə 1/4 finalda İrina Rinqaciyə (Rumıniya) uduzub. Rəqibləri finala qədər irəliləyə bilsə, Mirzəzadə və Manolova bürünc medal üçün təsəlliverici görüşə qatılacaqlar.

Birgül Soltanova (62 kq) isə təsnifatda Viktoriya Vessoylaya (Estoniya) məğlub olub. Estoniyalı idmançı növbəti raundda uduzduğundan, Soltanovanın medal şansı qalmayıb.