“Bizi narahat edən əsas məsələ AFFA-dan heç kimin Kənanla maraqlanmaması idi. “Qalatasaray”ın akademiyasında təhsil almaq övladımın ən böyük arzusu idi. Şükür, xəyalımız gerçəkləşdi. Kənan “Altınordu”nun akademiyasında 1 il 5 ay təhsil alıb. Artıq 5 ildi fasiləsiz və rəsmi lisenziya ilə burdadı. Bizim AFFA-dan gözləntimiz ən azı mənəvi dəstək olması idi. Çox təəssüf ki, 2021-ci il fevralın 12-dən etibarən yazdığımız məktublara heç bir cavab verilməyib. Yalnız bu il aprelin 14-də məsələni ictimailəşdirəndən sonra özünü AFFA nümayəndəsi kimi təqdim edən Orxan Mehdiyev bizlə əlaqə saxladı. Kənanla bağlı ətraflı məlumat əldə etdiklərini, daim izlədiklərini və baş katib Sərxan Hacıyevin də məsələnin həllində maraqlı olduğunu bildirdi. Lakin mən, sadəcə, Kənanla bağlı danışmaq istəmirəm. Ondan daha bacarıqlı uşaqlar da var. İstedadlı uşaqlara sahib çıxılmasını tələb edirəm. Onların böyük uğurlar qazana bilməsi üçün bu vacibdi. Düzdü, hər istedadlı uşaq peşəkar futbolçu olmur. Çox çətin yollardan keçərək illərlə əzmlə çalışmaq lazımdı. Buna baxmayaraq, hər ehtimal dəyərləndirilməlidi. Uşaq futbolunun inkişafı üçün vicdanlı və işini bilən məşqçilərə şans vermək lazımdı. Xaricdən gətirilərək “milliləşdirilən” və milyonlar xərclənən futbolçular Azərbaycan bayrağını və himnini həmyerlilərimiz kimi mənimsəyə bilməz. Onların, sadəcə, birinə ödənən pulla dünya səviyyəli yerli futbolçular yetişdirmək mümkündü. Futbol ruh işidi. Biz istəyirik ki, qalib gələk. Bayrağımızı tribunalarda başıuca dalğalandıra bilək”.