Corcina özünü xoşbəxt sayır - “Kriştiano və mən təvazökar ailələrdənik”
Corcina Rodriges sevgilisi Kriştiano Ronaldonun “Əl-Nəssr”də oynamasına görə Səudiyyə Ərəbistanında yaşamalarını problem saymır. Əksinə, Asiya ölkəsindəki həyatından razılıq edib.
"Football-plus.az" xəbər verir ki, Corcina Səudiyyə Ərəbistanındakı həyatları barədə fikirlərini belə ifadə edib:
“Bura gözəl ölkədi, çox təhlükəsizdi, çox rahatdı. Qadınlar və uşaqlar burda çox qorunurlar. Adamlar çox diqqətli və qayğıkeşdilər. Bir misal çəkim. Dostumun oteldə suyu yox idi və kafeyə getməyə qərar verdi. Bir adam onun hesabını ödədi. Yerli sakinlər çox səxavətlidilər. Gündəlik rejimim getdiyim hər yerdə həmişə eynidi. Uşaqlar, məktəb, məşqlər, iş və bəzən restoran. Tanrıya şükür, pulumuz var”.
Məşhur model 38 yaşlı sevgilisini də tərifləyib:
“O, gözəl atadı. Ronaldo həm də gözəl ər, oğul və qardaşdı. Çox vaxt evdə nahar edəndə düşünürəm ki, bu gözəl ailəni qurmaq üçün məni seçib. Mən çox xoşbəxtəm”.
Rodriges uşaqları tərbiyə etmələrindən də danışıb. O, övladlarını düzgün istiqamətə yönəltmək üçün müxtəlif üsullardan istifadə etdiyini deyib:
“Kriştiano və mən təvazökar ailələrdənik, hər fürsəti qiymətləndiririk. Biz həmişə uşaqlarımızı şükür etməyə çağırırıq. Bəzən onları aclıq çəkən uşaqlarla bağlı videolara baxmağa vadar edirəm. Deyirəm ki, bu hal onların da başına gələ bilər. Uşaqlıqda anam hər şeyi yeməyənə qədər masadan qalxmağıma icazə verməzdi...”
Qeyd edək ki, Ronaldonun 5 övladından ikisinin anası Corcinadı. Rodriges ailənin gələcək planlarından da danışıb. O, Ronaldo karyerasını başa vurandan sonra Portuqaliyanın paytaxtı Lissabonda yaşamaq niyyətində olduqlarını deyib:
“Lissabon gələcəkdə ailəmlə birlikdə yaşayacağımız şəhərdi. Bizi belə gözəl qəbul etdiklərinə görə bütün Səudiyyə Ərəbistanına təşəkkür edirəm. Bu yeni macəra bizi hədsiz dərəcədə həyəcanlandırır”.
Digər xəbərlər
