Şimali Makedoniyadan alınan biabırçı məğlubiyyət İtaliya yığmasına Qətər mundialına vəsiqəni əldən vermək bahasına başa gəldi.

Və indi Portuqaliya ilə həlledici oyuna çıxmaq üçün Portuya yollanmaq niyyəti ilə yaşayan “skuadra adzurra” depressiya içində Konyadadı. Roberto Mançininin komandası bu gün Türkiyə yığması ilə heç kimə lazım olmayan yoxlama oyunu keçirəcək. Bu da UEFA-nın yeni icadıdı: ilk pley-off oyunlarında uduzan komandalar öz aralarında oyun keçirirlər.
Bəs son Avropa çempionu niyə dünya çempionatından kənarda qaldı? Konkrek Şimali Makedoniya ilə oyunu götürsək, rəqib qapısı istiqamətinə 30-dan artıq zərbə və 16 künc zərbəsi fonunda bəxtsizlikdən də gileylənmək mümkündü. Və ya bu məqamı xatırlamaq olar ki, İtaliya yığmasının liderlərindən biri Jorjinyo seçmə turnirdə iki penaltini boşa verdi. Bunların hər biri “skuadra adzurra”ya mundiala birbaşa vəsiqə qazandıracaqdı.

Əslində AÇ-2020-dən dərhal sonra da İtaliya yığmasının perspektivi ilə bağlı nikbin düşünənlərin sayı o qədər də çox deyildi. Müasir Avropa futbolunda rəqabət necə yüksəkdisə, xatirələrlə uzun müddət yaşamaq olmaz. Hər uğurdan sonra əvvəlkindən də böyük enerji ilə işi davam etdirmək lazımdı. Bunu anlamayan komandanın qələbə qazanması mümkün deyil.
İtaliya yığması AÇ-2020-də qələbəni haqq etdi. Ötən yay bəxt də daxil hər şet Mançininin komandasının xeyrinə idi. Yığma səviyyəsinə görə o turnirdə heç də ən güclü komanda deyilsi, ancaq birlik, qibtə olunası qarşılıqlı “sığortalama”, hədsiz motivasiya və fədakarlıq hesabına qələbə qazana bildi. Ancaq sonradan həmin birlik magiyası əridi. İtaliya Futbol Federasiyası və bir qrup jurnalist pafoslu və onsuz da özünəvurğun Mançinini haqq etmədiyi dərəcədə dahiyə çevirdilər, halbuki qələbəni tək o yox, onlarla adam qazanmışdı. Oyunçulardan kimsə müəyyən müddətə motivasiyanı itirdi, bəziləri zədə üzündən sıradan çıxdılar, başqaları, ümumiyyətlə, formadan uzaq düşdülər. Düzdü, İtaliya yığması seçmə turnirin heç bir oyununda uduzmadı, bununla belə, qrupda liderliyi qələbəyə daha ac olan İsveçrəyə verdi.

Birlik və vahidlik ab-havası yaratmaq və bunu qorumaq dağıtmaqdan həmişə daha çətin və uzun prosesdi. İtaliya yığmasının 2021-in yazı və yayı üçün olan obrazı yəqin səfərdə oynayan, lideri Elmasın xidmətindən məhrum olan Şimali Makedoniyanı məğlub edərdi. Ancaq indiki “dişsiz” komanda bunu bacarmadı. “La Gazzettа dello Sport”un Palermodakı oyuna görə son qitə çempionatının üç qəhrəmanına necə aşağı qiymət verdiyini də görməyə dəyər. Mançini 4, qapıçı Donnarumma və yuxarıda adını çəkdiyimiz Jorjinyo 4,5 alıb. Oyun ərəfəsində İtaliya yığmasının ardıcıl iki dünya çempionatını buraxmaq haqqının olmadığını bildirən nəşr A seriyasının qonaqların qapısına qol vurmalı olan iki ulduzuna – İnsinye ilə İmmobiliyə də 4 verib.

DÇ-nin ardıcıl 2-ci seçmə tsiklini boşa vermək İtaliya futbolu üçün biabırçılıqdı. “Skuadra adzurra” hələ yenidənqurmaya və nəsil dəyişikliyinə ehtiyac duyur. Və əlbəttə, məğlubiyyətdən sonra göydən yerə vurulan Mançini və ya onun əzəedicisi mümkün qədər tez hücumçu problemini həll etməlidi. İtaliya yığması bu mövqedə əməlli-başlı “axsayır”.

Mançininin də bundan sonra özünü necə aparacağı aydın deyil. Axı yerli futbol qurumu ötən il onun müqaviləsinin müddətini 2024-ə qədər uzadıb, yəni nəzərə cəhətdən baş məşqçi postunda qalıb işini davam etdirə bilər. Ancaq o özü bunu istəyəcəkmi? Tezliklə bunu biləcəyik. Mançininin potensial əvəzedicisi kimi artıq Fabio Kannavaronun adı çəkilir. Deyilənə görə, onun məsləhətçisi də müdrik və təcrübəli Marçello Lippi olacaq.