“Tam haqlı qərardı. Zədələnmə ehtimalını nəzərə alsaq ölkə çempionatında mübarizə aparan klubun belə düşünməsi normaldı. Digər klubların da fikri bu yöndə ola bilər. Biz də istəmərik ki, “Qarabağ”ın hansısa futbolçusu digər klubun tərkibində zədələnsin. Təki heç bir komandada axsaqlıq yaranmasın.

Təmsilçimizin tam öz heyəti ilə meydana çıxmasını istəyərdik. Təəssüf ki, zaman və şərait baxımından bu mümkün deyil. Baş məşqçimiz də belə halın yaşanmasını arzulamazdı. Lakin Türkiyədə zəlzələdən zərərçəkənlərə yardım etmək məqsədilə bu addım atılmalı idi.

“İmarət” hər iki klubun açıqlamalarını anlayışla qarşılayır. Heç kimi qınamağa haqqımız yoxdu. Hər kəs haqlı görünür. Təqvimin sıxlığı, klubların hədəfləri və qardaş ölkəyə tezliklə kömək etməyin zəruriliyi hər şeyi izah edir”.