Çempionlar Liqasında 1/4 finala yüksələn və bundesliqada ardıcıl 11-ci çempionluğa doğru irəliləyən “Bavariya” ilə bağlı maraqlı bir xəbər var.

"Football-plus.az"ın məlumatına görə, Münhen nəhəngi ötən həftəiçi öz meydanında ÇL-in 1/8 finalının cavab oyununda PSJ-ni 2 cavabsız qolla üstələdi.

Həmin qarşılaşmanın 38-ci dəqiqəsində qapıçı Yan Zommerin kobud səhvindən sonra parislilər hesabı açmağa çox yaxın oldular. Amma niderlandlı müdafiəçi Mattiys de Liqt mükəmməl “sürüşmə” fəndi ilə son anda topu qapı xəttindən uzaqlaşdıraraq komanda yoldaşının səhvini “sığortalamışdı”. Oyundan sonra isveçrəli qapıçı De Liqtə xüsusi şəkildə minnətdarlığını bildirmiş və ona bir yük maşını ilə dolu olan şokolad göndərəcəyini demişdi. Çoxları bunu zarafat kimi qəbul etsə də, Zommer sözünün üstündə durub! Sən demə, oyundan bir gün sonra, yəni ötən cümə axşamı İsveçrənin məşhur “Kagi” şokolad firması Zommerin adından De Liqtə təşəkkür bildirmək üçün içi şirniyatla dolu yük maşınını Toqqenburqdan Münhenə göndəribmiş. Bu, qeyri-adi şokolad idi. Daha çox üstü südlü şokoladla örtülmüş vafliyə bənzəyirdi. Özü də yükün ümumi çəkisi nə az, nə çox – düz 700 kq idi! Amma yük maşını Münhenə yaxınlaşanda problemlər yarandı. İsveçrədən yola çıxan və təxminən 3 saatlıq yol qət edən yük maşını Münhenə buraxılmadı. Ona görə də hədiyyəni De Liqtə çatdırmaq mümkün olmadı. Amma “Kagi” şirkəti bir qədər düşündükdən sonra başqa çıxış yolu tapdı. Yük geri qaytarılmaq əvəzinə “Tafel” adlı xeyriyyə fonduna göndərildi. Bu fond kasıbları ərzaqla təmin etməsi ilə məşhurdu.